शिरोळ - पंचगंगा नदी प्रदूषणप्रश्‍नी स्वाभिमानी संघटनेच्या कार्यकर्त्यांनी काल प्रशासनाच्या बैठकीवर बहिष्कार टाकून नदी पात्रात उतरून अधिकाऱ्यांना नदी काठावरच बैठक घेण्यास भाग पाडून प्रदूषणप्रश्‍नी अधिकाऱ्यांना धारेवर धरले. उपविभागीय अधिकारी विकास खरात यांनी बैठकीत दिलेल्या आदेशानुसार आज पंचगंगा नदीपात्रातील मृत मासे संकलित करण्याचे काम इचलकरंजी नगरपरिषदेच्या स्वच्छता विभागाकडून सुरू झाले. 

शिरोळ व तेरवाड बंधारा दरम्यान पंचगंगा नदीपात्रात मृत माशांचा खच पडल्याने दुर्गंधी पसरली आहे. यामुळे बुधवारी उपविभागीय अधिकारी विकास खरात, तहसीलदार अपर्णा मोरे धुमाळ, तसेच प्रदूषण नियंत्रण मंडळाचे प्रादेशिक अधिकारी प्रशांत गायकवाड व स्वाभिमानी शेतकरी संघटनेचे कार्यकर्ते यांच्यात खडाजंगी बैठक झाली. बैठकीत मृत मासे पात्रातून बाहेर काढून विल्हेवाट लावण्याचे आदेश खरात यांनी दिले होते. 
या पार्श्‍वभूमीवर इचलकरंजी नगरपालिका पाणीपुरवठा विभागाचे शाखा अभियंता बाजीराव कांबळे यांनी पंधरा कर्मचाऱ्यांसह मृत मासे बाहेर काढण्यास सुरवात केली. आज पहिल्या दिवशी सुमारे दीड ट्रॉल्या मृत माशांची विल्हेवाट लावली. 

हे पण वाचा -   पहिल्या प्रेमानेच दिला दगा; फोटो व्हायरल करण्याची धमकी दिली अन्

इचलकरंजी नगरपालिकेकडील यांत्रिक बोट आज सायंकाळी दुरुस्त केली आहे. शुक्रवारपासून मृत मासे बाहेर काढण्याच्या प्रक्रियेला वेग येणार आहे. मृत मासे इचलकरंजी नगरपालिकेच्या मालकीच्या मैल खड्ड्यात गाडले जाणार आहेत.   

- बाजीराव कांबळे, शाखा अभियंता पाणीपुरवठा विभाग 

संपादन - धनाजी सुर्वे