कोल्हापूर : भटक्‍या कुत्र्यांच्या हल्ल्यात जेऊर (ता. पन्हाळा) येथे आज मादी साळींदराचा मृत्यू झाला. गर्भवती असलेल्या मादी साळींदराचे एक पिल्लू मृत पावले तर दुसरे छोटे पिल्लू मात्र जीवंत सापडले असून वनविभागाने त्याला सुरक्षीत ताब्यात घेतले आहे. 
भटक्‍या मोकाट कुत्र्यांचा उपद्रव सर्वच भागात दिसत आहे. जिल्हाभरात दररोज 20 ते 40 व्यक्तींवर भटक्‍या कुत्र्यांकडून हल्ला होत आहे. दानवाड (ता. शिरोळ) परिसरात दोन शेतकरी महिलांवरही भटक्‍या कुत्र्याने हल्ला केला या घटनेपाठोपाठ आता भटक्‍या कुत्र्यांनी वन्यजीवांनाही लक्ष केल्याची प्रचिती जेऊर येथील घटनेवरून दिसत आहे. 

हेही वाचा - नोकरभरतीत पाच टक्के जागा प्रकल्पग्रस्तांना; अहवाल सादर करण्याचे राज्यमंत्र्यांचे आदेश -

सुत्रांनी दिलेली माहिती अशी की, जेऊर परिसरात पन्हाळा गडा लगत जंगल आहे. या भागातील साळींदर जंगला बाहेर आले. त्या साळींदरावर भटक्‍या कुत्र्यांनी हल्ला केला त्यानंतर साळींदर मृतावस्थेत पडल्याचे प्राणी मित्रांनी पाहिले. त्याची माहिती वनविभागाला दिली. वनविभागाच्या पथकाने येथे पहाणी केली असता मृत साळींदराची छोटे पिल्लू जीवंत असल्याचे दिसले. त्याला ताब्यात घेतले तसेच त्याची प्रकृती स्थिर आहे. अशी माहिती वनपाल विजय दाते यांनी दिली. 

...यांची झाली मदत 

वाईल्ड लाईफ प्रोटेक्‍शन ऍण्ड रिसर्च सोसायटीचे प्रदीप सुतार, अलमतीन बागी यांच्यासह प्राणी मित्र महेश खेतल, कृष्णात महाडीक यांनीही पिल्लाला सुरक्षीत ठेवण्यासाठी मदत कार्य केले. असे माहिती सुत्रांकडून देण्यात आली. 

संपादन - स्नेहल कदम