कोल्हापूर -  विविध मागण्यांसाठी माथाडी कामगारांनी सोमवारी कामबंद आंदोलन केल्याने कोल्हापूर शेती उत्पन्न बाजार समितीमधील गूळ व कांदा-बटाटा विभागाची उलाढाल ठप्प झाली. बाजार समितीतील एक हजार हमाल, तोलाईदार संपात सहभागी झाले होते. 

माथाडी कामगारांसाठी घरकूल योजना तातडीने राबवावी अशी मागणी गेली अनेक वर्षे माथाडी कामगार युनियनची आहे. त्याचबरोबर अनेक बाजार समित्यांमध्ये लेव्हीचा प्रश्नही आहेत. या मागण्यांसाठी माथाडी कामगार युनियनचे अध्यक्ष माजी आमदार नरेंद्र पाटील यांनी सोमवारी बाजार समित्या बंदची हाक दिली होती. कोल्हापूर बाजार समितीमधील गूळ, कांदा-बटाटा विभागातील माथाडी कामगार त्यामध्ये सहभागी झाल्याने उलाढाल ठप्प झाली. फळे, भाजीपाला विभाग मात्र सुरूच राहिला. अमावस्येदिवशी जिल्ह्यातील बहुतांशी गुऱ्हाळघरे बंद असतात, त्यामुळे या दिवशी आवक होत नाही. त्यामुळे गूळ विभागावर त्याचा फारसा परिणाम दिसला नाही. मात्र, कांदा-बटाट्याचे सौदे झाले नाहीत, त्याचा परिणाम उलाढालीवर झाला. 
या आंदोलनाचा परिणाम गुळाच्या दरावर होणार आहे. या हंगामात गुळाची आवक जास्त होत आहे. सद्या गुळालाही चांगला भाव आहे, पण आंदोलनामुळे सौदे झाले नाहीत तर गुळाचा साठा वाढतो, त्यातून गुळाचा दर पडण्याची शक्‍यता आहे.

हे पण वाचा - मुलीच्या शिक्षणासाठी धडपडणाऱ्या सलीम यांच्या जाण्याने हळहळतय गाव!

अगोदरच शेतीमालाचे दर कोसळल्याने शेतकरी अडचणीत आहेत. साखर कारखान्यांकडून प्रतीटन ऊसाला मिळणाऱ्या दराच्या तुलनेत गुळाला चांगला दर मिळतो. अशा परिस्थितीत या ना त्या कारणाने सौदे वेळेत झाले नाहीत तर गुळाचे दर उतरण्याची शक्‍यता आहे. 

 
संपादन - धनाजी सुर्वे