कोल्हापू : राज्यातील शिक्षक कोरोनाच्या कामात व्यस्त आहेत. हे करत असताना ऑनलाईन अध्ययन-अध्यापनाची साप्ताहिक माहिती लिंकवर भरण्यासाठी परिपत्रक काढले आहे. ही माहिती लिंकवर भरावयास लावण्यामुळे शिक्षक व शिक्षण प्रक्रियेतील अधिकारी यांच्यावर गैरविश्‍वास दाखवल्याचा प्रकार आहे. त्यामुळे हे अध्ययन -अध्यापन माहिती भरण्याचे आदेश रद्द करावेत अशी मागणी महाराष्ट्र राज्य प्राथमिक शिक्षक संघाच्या वतीने करण्यात आली आहे. जर आदेश रद्द केले नाहीतर या प्रक्रीयेवर बहिष्कार घालण्याचा इशारा संघटनेकडून देण्यात आला आहे. 

सद्य स्थितीत राज्यात ग्रामीण भागात विद्यार्थी शिक्षणापासून वंचित राहू नये म्हणून शाळा बंद शिक्षण सुरु हा उपक्रम सुरु आहे. या अंतर्गत राज्यातील शिक्षक प्राप्त परीस्थितीत ऑनलाईन अध्यापन करत आहेत. यामध्ये झूम, गुगल मिट या सारख्या नवीन तंत्रज्ञान वापर करीत विद्यार्थ्याना अध्यापन करत आहेत. तसेच काही शिक्षकांनी स्वाध्याय पुस्तिका विकसित करून विद्यार्थ्यापर्यंत पोहोच केल्या आहेत. असे असताना ऑनलाईन साप्ताहिक माहिती भरण्या संदर्भात परिपत्रक काढले आहे. या परिपत्रकाने शिक्षकांत असंतोष निर्माण झाला असून हे परिपत्रक रद्द करण्याची मागणी करण्यात आली आहे. 

हे पण वाचा - सरकारने पात्र हजारो मराठा उमेदवारांची नियुक्ती करावी  

परिपत्रक रद्द नाही केल्यास शिक्षक संघाचे नेते संभाजीराव थोरात यांच्या नेतृत्वाखाली राज्यातील सर्व प्राथमिक शिक्षक लिंक भरण्याच्या प्रक्रियेवर बहिष्कार घालणार आसल्याचे पत्रक शिक्षक संघाचे कोल्हापूर जिल्हा अध्यक्ष रविकुमार पाटील व प्रदेशाध्यक्ष बाळकृष्ण तांबारे, मोहन भोसले, एन वाय पाटील, जनार्दन निउनगरे ,रघुनाथ खोत, सुनील पाटील, बाळकृष्ण हळदकर, दुन्देश खामकर, अरुण चाळके, किरण शिंदे यांनी प्रसिद्धीस दिले आहे.  

  संपादन - धनाजी सुर्वे