कोल्हापूर : शोभेचे माशे सांभाळणे, विविध शोभिवंत पक्षी घरामध्ये असणे ही अनेकांची हौस आहे. यातूनच विविध प्रकारचे शोभिवंत मासे आणि पक्षी हे बाहेरील देशातून आणून सांभाळले जातात. मात्र सध्या लॉकडाऊनचा फटका या हौशी मंडळींना बसला आहे.  शिवाय सध्याच्या परिस्थितीमुळे या शोभिवंत माशांचा व्यवसाय करणारे व्यावसायिक देखील अडचणीत आले आहेत. येणाऱ्या मालाचीच अवाक थांबल्यामुळे नेमके विक्री कशाची करायची हा प्रश्न या व्यवसायिकांसमोर आहे.  

अनेकांच्या घरामध्ये शोभेच्या माशांची पेटी असते. या पेटीमध्ये फिरणारे लहान मोठे रंगबिरंगी अनेक माशे असतात. प्रत्येकाच्या हौसेनुसार पेटीचा आकार लहान मोठा असतो. शिवाय या पेटीमध्ये माशांसह काहींच्याकडे निव्वळ संगोपनासाठी असणारे कासव देखील आपल्या नजरेस पडते. मात्र या हौशी लोकांचा हिरमोड सध्या झाला आहे. कोरोनामुळे सर्वत्रच लॉकडाऊन असल्यामुळे या माशांची अवाक घटली आहे. विक्रेत्यांकडे विक्रीसाठी माशे उपलब्ध नाहीत. या पेटीमधील माशांना लागणारे खाद्य देखील बाहेरील देशातूनच आयात केले जाते. पेटीच्या सजावटीसाठी असणाऱ्या अनेक गोष्टी तसेच पेटीचे स्वास्थ्य टिकवून ठेवण्यासाठी लागणारे हिटर, क्लिनिंग फिल्टर, ऑक्सिजन मशीन , लाईट हे सर्व देखील आयात केले जाते. 80 टक्केहून अधिक माल हा आयात  केला जात असल्यामुळे हा व्यवसाय सध्या पाण्यात आहे. 

भारतामध्ये सर्वात मोठी अवाक ही चैन्नई मध्ये होते. येथून पुढे देशभर हा माल पोचवला जातो. सर्वाधिक मासे हे बँकॉक, पटाया, मलेशिया, थायलँड येथून तर त्यांचे खाद्य हे चीन, बँकॉक मलेशिया येथून येते. भारतामध्ये शोभिवंत मास्यांचे उत्पादन मागणीच्या मानाने अल्प प्रमाणात होते. 

हे पण वाचा - माझ्या अपमानापेक्षा समाजाचे काम मार्गी लागले हे महत्वाचे!  संभाजीराजे छत्रपती

गेल्या चार महिन्यांहून अधिक काळ हा व्यवसाय बंद आहे. उपलब्ध असणारे माशे आणि खाद्य या मध्येच व्यवसाय सुरु आहे. शिवाय आवाक घटल्यामुळे आणि शिल्लक माल चढ्या किमतीने खरेदी करावा लागत असल्यामुळे दर वाढले आहेत. याचा परिणाम व्यवसायावर मोठ्या प्रमाणात होत आहे.

-वसीम काझी, व्यावसायिक 

संपादन - धनाजी सुर्वे