कोल्हापूर : कोरोनामुळे सर्वानाच आरोग्याची काळजी आहे. सध्या सर्वत्र चर्चा सुरु आहे ती ऑक्‍सिमीटरची. शरीरातील ऑक्‍सिजनाचे प्रमाण मोजणारे हे मीटर विशेष चर्चेत आहे. त्याची वाढती मागणी आणि किंमतीचा गैर फायदा घेण्यासाठी हॅकर सज्ज झाले आहेत. विविध बनावट अँप्लिकेशनची निर्मितीकरून त्याद्वारे वापरकर्त्यांची वयक्तिक माहिती चोरण्याचे प्रकार सुरु आहेत. 

कोरोना संसर्गाच्या परिस्थितीमध्ये देखील हॅकर्सनी नागरिकांच्या वयक्तिक माहितीवर डल्ला मारण्याची तयारी केली आहे. सध्या सर्वाधिक चर्चेत आणि वापरात असणारे ऑक्‍सिमीटर यासाठी निवडले आहे. बाजारपेठेत उपलब्ध ऑक्‍सिमीटरची किंमत एक हजार रुपयांहून अधिक आहे. यामुळे अनेकांनी स्वस्त पर्याय शोधण्यास सुरवात केली आहे. यातूनच हॅकर्सनी बनावट अँप्लिकेशनच्या निर्मितीने वैयक्तिक माहिती चोरण्याचा प्रकार सुरु केला आहे. असे अनेक बनावट अँप्लिकेशन सध्या अँड्रॉइड आणि आय.ओ.एस. फोन वापरकर्त्यांसाठी उपलब्ध आहेत. या बनावट अँपचा वापर करणाऱ्या व्यक्तीच्या फोन मधून संपर्क क्रमांक, फोटो आणि व्हिडीओ, बॅंकेची माहिती, ऑनलाईन पेमेंट माहिती, विविध पासवर्ड आणि सांख्यिकीमाहिती चोरण्याचा धोका आहे. 
ऑक्‍सिमीटर वापरण्या ऐवजी ऍपद्वारे मोबाईल लाईटवर बोटांनी किंवा फिंगरप्रिंट लावून स्तर मोजले जाऊ शकत असल्याचा दावा या अँप मधून केला जातो. मात्र अश्‍या पद्धतीने ऑक्‍सिजनचे नेमके प्रमाण मोजणे शक्‍य नसल्याचे तज्ज्ञांचे मत आहे. 

अशी होते फसवणूक 

- ऍप्लिकेशन वापरासाठी कॉललॉग, गॅलरी , मॅसेज आणि स्टोरेज परमिशन घेतली जाते. 
- ऑक्‍सिजन पातळी मोजण्यासाठी फिंगरप्रिंट स्कॅनर, कॅमेरा, फ्लॅश लाईट चा वापर करण्यास सांगितले जाते. 
- विशिष्ट्य वेळेनंतर मोबाईल स्क्रीनवर काही आकडेवारी येते. 
- ही आकडेवारी प्रमाणित आहे किंवा नाही याची शास्वती नाही. 

काही बनावट अँप्लिकेशन ही निव्वळ फसवणुकीच्या हेतूनेच बनवण्यात आली असतात. अशा ऍप्लिकेशन पासून सावध राहणे गरजेचे आहे. ऍप बाबत खातरजमा करूनच आवश्‍यक माहिती द्यावी. 
सुशांत चव्हाण, सहाय्यक पोलीस निरीक्षक.