शिरोळ (कोल्हापूर) - शिरोळ येथे भाड्याच्या घरात राहणाऱ्या, एका कुटुंबातील 21 वर्षे युवतीला श्वास घेण्यास त्रास होऊ लागल्याने तिला मिरज येथील शासकीय रुग्णालयात दाखल करण्यात आले आहे. युवतीचे घशातील स्त्राव घेण्यात आले आहेत. युवतीचे वैद्यकीय अहवाल प्राप्त झाल्यानंतरच तिला कोरोना ची लागण झाली आहे की नाही हे स्पष्ट होणार आहे. तथापि शिरोळ सह परिसरातील गावांमध्ये घटनेमुळे घबराट पसरली आहे.

तालुक्यातील एका गावातील कुटुंब, शिरोळ येथील, एका उपनगरात  भाड्याने राहत आहे. कुटुंबातील एक युवती पुणे येथे नोकरी होती. कोरोना च्या पार्श्वभूमीवर युवती आपल्या घरी आली होती. गेली तीस दिवस घरातच ती होम कोरंटाईन होती. गुरुवारी रात्री दहाच्या सुमारास या युवतीला श्वास घेण्यास त्रास होऊ लागला, म्हणून तिला येथील ग्रामीण रुग्णालयात उपचाराकरिता नेण्यात आले. येथील  डॉक्‍टरांनी युवतीला उपचाराकरिता मिरज येथील शासकीय रुग्णालयात पाठवले.

वाचा - कोल्हापूरकरांचा रोज 15 लाख अंड्यांवर ताव..                     

ही बातमी आज सकाळी शिरोळमध्ये वाऱ्यासारखी पसरली. शिरोळ मध्ये कोरोना चा संशयित रुग्ण सापडल्याची बातमी, संपूर्ण तालुक्यात पसरली.   युवतीचे घशातील स्त्राव वैद्यकीय चाचणीसाठी घेण्यात आले आहेत. वैद्यकीय अहवाल प्राप्त झाल्यानंतरच, संबंधित युवतीला, कोरोना ची लागण झाली आहे की नाही हे स्पष्ट होणार आहे.