शिरोली पुलाची (कोल्हापूर) - येथील छ्त्रपती संभाजीराजे चौकात सोशल डिस्टन्सचा बोजवारा उडाला असून, किराणा दुकाने, फळ भाजी विक्रीच्या ठिकाणीही गर्दी वाढत आहे. दररोज सकाळी या चौकात यात्रा भरल्याचे स्वरूप असते.

कोरोना विषाणूंचा प्रादुर्भाव रोखण्यासाठी जिल्हा प्रशासनाच्या वतीने विविध प्रयत्न केले जात आहेत. संपूर्ण देशात टाळेबंदी लागू आहे. प्रत्येक माध्यमांमधून जनजागृती केली जात आहे.माणसाने माणसापासून सुरक्षित अंतर ठेवून राहण्याशिवाय पर्याय नाही हे सर्वजण ठासून सांगत आहेत. त्यासाठी सर्वांनी घरात बसावे म्हणून संचारबंदी लागू केली. संचार बंदीच्या काळात सर्वसामान्य नागरिकांना जीवनावश्यक वस्तूची खरेदी करण्यासाठी सकाळी सात ते दहा अशी तीन तासाची सुट्टी दिली आहे ; मात्र या काळातच सर्व नियम धाब्यावर बसवून नागरिक एकत्र येत आहेत. चौकात विक्रेतेच दाटीवाटीने बसतात, त्यामुळे खरेदी करताना ग्राहकांचीही गर्दी होते. त्यामुळे सोशल डिस्टन्सचा पार बोजवारा उडतो आहे.

वाचा - राज्य सरकारची अधिसूचना निघेपर्यंत दुकाने,अस्थापना सुरू करू नयेत : जिल्हाधिकारी दौलत देसाई

ग्रामपंचायतीकडून कोरोनाबाबत जनजागृती करत, नागरिकांनी केंद्र आणि राज्य सरकारच्या नियमांचे पालन करा. खरेदीसाठी गर्दी करु नका, आवश्यता असेल तरच घराबाहेर पडा, असे आवाहन वारंवार करण्यात येत आहे. मात्र, नागरिक या आवाहनाकडे दुर्लक्ष करीत असल्याचे संभाजीराजे चौकातील गर्दीवरुन स्पष्ट होत आहे. तसेच गर्दी झाल्यास किंवा नियम तोडल्यास ग्रामपंचायत कोणतीही कारवाई करत नसल्याचे चित्र आहे. गटातटाचे राजकारण व वैयक्तिक हितसंबध यामुळे कारवाई करण्यात अडचण येत असल्याचे लोकप्रतिनिधीकडून सांगण्यात आले. त्यामुळेच नागरिकांना कारवाईचे भय राहिलेले नाही. त्यामुळे पोलिसांनी आता कोठोर कारवाई करावी अशी मागणी सुज्ञ नागरिकांमधून होत आहे.

सार्वजनिक ठिकाणी अनेक नागरिक तोंडाला मास्क न लावता, रूमाल न बांधता फिरत आहेत. काही कार्यक्रमात लोकप्रतिनिधीच मास्कचा वापर करत नसल्याचे दिसून येते.  तसेच सार्वजनिक ठिकाणी थुंकणे, सोशल डिस्टन्स न ठेवणे असे प्रकार पहायला मिळत आहेत. यामधून कोरोना रोगाविषयी नागरिक गंभीर नसल्याचे चित्र आहे. अशा लोकांवर ग्रामपंचायत व पोलीस प्रशासनाने कडक कारवाई करणे गरजेचे आहे.