बेळगाव - 'साहेब हवी तर कोथींबीर घरी घेऊन जा. पण, अशी गटारीत टाकू नका, घाम गाळून कोथींबीरीचे पिक घेतले आहे. काम नसल्याने घर चालविण्यासाठी कोथींबीर विकण्यास घराबाहेर पडलो आहे. गटारीत कोथींबीर टाकून शेतकऱ्याचा अवमान करु नका', अशी पोलिसांकडे आर्त विनवणी करणाऱ्या शेतकऱ्याकडे दुर्लक्ष करीत त्याची कोथींबीर अखेर गटारीत टाकली.

शेतातील कोथींबीर घेऊन सायकलवरून त्याची घरोघरी विक्री करण्यास निघालेल्या शेतकऱ्याची कोथींबीर पोलिसांनी गटारीत टाकण्याचा घृणास्पद प्रकार गुरुवारी वडगाव येथे घडला. सध्या शेतातील पिकांची उचल होत नसल्याने पिके शेतातच कुजून पडत असून भाजी विक्रेत्यांना फिरुन भाजी विक्री करण्याची मुभा अनेक ठिकाणी देण्यात आली आहे. मात्र शेतकऱ्याला आपली भाजी विक्री करण्यास मात्र नकार दिला जात आहे.

हे पण वाचा - पोलिसांनाही मन असतेच ना भाऊ ! त्या गरोदर माऊलीला नेले रुग्णालयात... 

सायकलवरुन फिरुन घरोघरी कोथींबीर विक्री करणाऱ्या शेतकऱ्याकडून कोणत्याही प्रकारे सोशल डिस्टंसिंगचे उल्लंघन झाले नव्हते. मात्र तरीही शेतकऱ्यास घाम गाळून पिकविलेले पिक असे गटारीत टाकले जात असताना व्याकुळतेने पहात थांबावे लागले. वडगाव भागातील सुमारे 60 वर्षीय गंवंडी कामगार व्यक्ती अल्पभूधारक शेतकरी देखिल आहे. सध्या गवंडी काम बंद असल्याने शेतातील कोथींबीर घेऊन सदर व्यक्ती त्याची विक्री करण्यासाठी सायकलवरुन वडगाव भागात फिरत होती. सुमारे 25 पेंडी कोथींबीर होती. वय अधिक असल्याने सायकलवरुन फिरुन दमल्याने सदर शेतकरी सावलीखाली थांबला होता. याचवेळी समोरुन पोलिसांचे वाहन आहे. तसेच शेतकऱ्याला शिवीगाळ करीत वाहनातील पोलिसांनी त्याची कोथींबीर हिसकावून घेतली. पोलिसांनी कोथींबीर हिसकावून घेतल्यानंतर ती परत देण्याची तसेच तेथून लगेच निघून जाऊ अशी विनवणी शेतकरी करीत होता. मात्र पोलिसांनी त्याचे काहीच ऐकले नाही. शेतकऱ्यावर हात उगारत अखेर त्याची कोथींबीर त्याच ठिकाणी गटारीत टाकून देण्यात आली. परिसरातील नागरीकांसमोरच हा प्रकार घडला. कोथींबीर टाकल्यानंतर पुन्हा त्या शेतकऱ्याला दमदाटी करण्यात आली. त्यामुळे घाबरलेल्या अवस्थेत शेतकरी तेथून निघून गेला.