कोल्हापूर : ‘मिशन संवेदना’ (mission sanvedana) संकल्पने अंतर्गत जिल्हा पोलिस (kolhapur police force) दल कर्तव्याबरोबर वंचित व गरजूंना मदतीसाठी धावून जात आहेत. आज सांगली फाटा येथे बेशुद्ध अवस्थेत पडलेल्या फिरस्त्याला पोलिसांनी वेळेत उपचारासाठी पाठवून त्याचे प्राण वाचविले.

अपर पोलिस अधीक्षक तिरुपती काकडे हे आज सकाळी सांगली फाटा येथील नाकाबंदीची पहाणी करण्यासाठी गेले होते. त्यांना येथे एकच पोलिस अमंलदार असल्याचे निदर्शनास आले. त्यांनी येथील उपस्थित पोलिस कर्मचाऱ्यांकडे याबाबत चौकशी केली. त्यावेळी त्यांनी जवळच एक फिरस्ता बेशुद्ध अवस्थेत पडला आहे. त्याच्या मदतीसाठी सहकारी गेले असल्याचे सांगितले. त्याठिकाणी काकडे यांनी धाव घेतली. त्यावेळी येथील वाहतूक पोलिस कर्मचारी सुरेश कांबळे व त्यांच्या इतर सहकाऱ्यांनी रुग्णवाहिका बोलवून घेतली होती. त्यातून त्यांनी संबधित फिरस्त्याला रुग्णालयात पाठवले.

कसबा बावडा सेवा रुग्णालयात त्याला वेळेत उपचार मिळाल्याने त्यांचे प्राण वाचले. पोलिस अधीक्षक शैलेश बलकवडे यांनी पोलिसांच्या या कार्याचे कौतुक केले. पोलिसांनी डोंगराळ भागातील वाडीवस्‍ती, परप्रांतिय मजूर, वारांगणा, तृतीयपंथी यांना मदतीचा हात दिला जात आहे. शनिवारी शहर वाहतूक शाखेने तृतीयपंथीयांना धान्य वाटप केले. शहर वाहतूक शाखेच्‍या निरीक्षक स्‍नेहा गिरी यांनी पुढाकार घेवून वाटपासाठी धान्‍य व भाजीची उपलब्‍धता केली.