कोल्हापूर : कोल्हापुरात पोटनिवडणुकीच्या निमित्तानं वातावरण चांगलंच तापलंय. महाविकास आघाडी (Mahavikas Aghadi) विरुध्द भाजप (BJP) असाच काहीसा सामना रंगताना दिसतोय. दोन्ही बाजूच्या नेत्यांकडून आरोप-प्रत्यारोपाच्या फैरी झडत आहेत. केंद्रातील भाजप सरकार सर्व पातळीवर अपयशी ठरलं असून, आपलं अपयश लपविण्यासाठी महाविकास आघाडी सरकारमधील मंत्र्यांना, राजकीय नेत्यांना खोट्या खटल्यात अडकविण्याचा उद्योग सुरूय. सीबीआय, इन्कम टॅक्स, ईडीसारख्या (ED) यंत्रणांचा गैरवापर सुरू केला असल्याचा गंभीर आरोप माजी मुख्यमंत्री पृथ्वीराज चव्हाण (Prithviraj Chavan) यांनी केलाय.

शहरातील वारे वसाहत व सिद्धार्थनगर येथील प्रचारसभेत ते बोलत होते. महाविकास आघाडीच्या उमेदवार जयश्री जाधव यांच्या प्रचारार्थ या सभांचं आयोजन करण्यात आलं होतं. दरम्यान, सभेत चव्हाण यांनी मोदींच्या (Narendra Modi) नेतृत्वाखालील भाजप सरकारच्या (BJP Government) धोरणांवर सडकून टीका केली. भाजप सरकारची धोरणं देशाला आणि सर्वसामान्य जनतेला दारिद्र्याच्या खाईत ढकलत आहेत. मोदींना सरकार चालवायला जमत नाहीय, असंही त्यांनी स्पष्ट केलं.

ते पुढे म्हणाले, सरकारी विमान कंपन्या, विमानतळ, रेल्वे, सरकारी जमिनी विकायचं काम सुरूय. त्यामुळं सगळ्यांना नेहमी फसवू शकत नाही. जनता आता शहाणी झालीय. भाजपची सत्ता उधळून लावण्याची सुरुवात कोल्हापुरातून होईल, असा विश्वास चव्हाण यांनी व्यक्त केला. यावेळी आमदार जयंत आसगावकर, जयश्री जाधव, वसंत लिंगनूरकर यांची भाषणे झाली. निशिकांत सरनाईक, सुशील कोल्हटकर, जय पटकारे, लता कदम, शारंगधर देशमुख उपस्थित होते.