गडहिंग्लज : बड्याचीवाडी (ता. गडहिंग्लज) येथे काळभैरव यात्रेनिमित्त झालेल्या कुस्ती मैदानात कोल्हापूरच्या पृथ्वीराज पाटीलने तुल्यबळ इचलकरंजीच्या प्रशांत जगतापचा घिस्सा डावावर मात करून बाजी मारली. दुसऱ्या क्रमांकाच्या लढतीत लिंगनूर (ता. गडहिंग्लज) येथील सुधीर कुरळेने सांगलीच्या पवन देशमुखला माती चारली.

इचलकरंजीच्या श्रीमंत भोसले आणि सांगलीचा आशिफ मुल्लाणी यांची लढत बरोबरीत सोडविण्यात आली. कुस्त्या पाहण्यासाठी शौकिनांची गर्दी होती. पहिल्या क्रमांकाच्या कुस्ती रंगतदार झाली. तब्बल वीस मिनिटे चढाओढीनंतर पृथ्वीराज पाटीलने मैदान मारले. इतर कुस्त्यात सागर मोरे, अक्षय राऊत, बाळू घोडके, रोहन ढोले, शुभम राक्षे, ओंकार राक्षे, यश कांबळे, अक्षय कोरे, तेजस खांडेकर यांनी आपापल्या प्रतिस्पर्ध्यावर विजय नोंदविला.

यावेळी महाराष्ट्र केसरी विष्णू जोशीलकर, महापौर केसरी अमृता भोसले, सरपंच सतीश कोळेकर, शंकर कुरळे, उमेश रामजी, बापू खोत, कांता राक्षे, युवराज दळवी, दत्तात्रय सुतार, प्रसाद दड्डीकर, जनार्दन खोत, रामगोंडा पाटील, कुमार पाटील, नामदेव दळवी, संजय खोत उपस्थित होते. स्पर्धा समितीचे आप्पासाहेब म्हेत्री, पुंडलिक गायकवाड, काशिनाथ बेळगुद्री, अशोक शिंदे यांनी स्पर्धेचे नियोजन केले. संयोजक विश्‍वास खोत यांनी आभार मानले.