कोल्हापूर - एका कोरोना पॉझिटिव्ह रुग्णाला खासगी रुग्णालयाने तब्बल अडीच लाखांचे बिल आकारले. मात्र, महापालिकेतर्फे नेमलेल्या ऑडिटरने सरकारी दराप्रमाणे हे बिल केवळ ८५ हजारांपर्यंत आणले. तब्बल एक लाख ६५ हजारांहून अधिक बिल रुग्णाकडून जादा घेतल्याची माहिती नुकताच उघडकीस आली आहे. त्यामुळे खासगी रुग्णालये रुग्णांकडून बिलाच्या माध्यमातून अवास्तव आकारणी करीत असल्याचे आज पुन्हा एकदा अधोरेखित झाले. खुद्द महापालिका आयुक्त डॉ. मल्लिनाथ कलशेट्टी यांनी मुख्य ऑडिटरकडील ही माहिती सायंकाळी पत्रकारांना दिली.

शहरातील खासगी रुग्णालयांत कोविड रुग्णांकडून बिलाची अवास्तव आकारणी केली जात असल्याच्या तक्रारी आल्यानंतर जिल्हाधिकारी दौलत देसाई यांच्या आदेशानुसार आयुक्तांनी प्रत्येक रुग्णालयासाठी दोन ऑडिटर नियुक्त केले आहेत. त्यामुळे खासगी रुग्णालयाकडून आकारली जाणारी अवास्तव बिले रोखण्यात प्रशासनाला यश आले आहे. 

याबाबत अधिक माहिती मुख्य ऑडिटरनी दिली. त्यांनी सांगितले, की शहरातील एका नामवंत रुग्णालयात कोरोना पॉझिटिव्ह रुग्णांवर उपचार सुरू होते. नुकताच रुग्णाला डिस्चार्ज दिला आहे. या वेळी रुग्णाला हॉस्पिटलने दोन लाख ५० हजार ६४० रुपयांचे बिल दिले होते. हे बिल ऑडिटरनी पाहिले, तेव्हा ते अधिक असल्याचे लक्षात आले. त्यांनी बिलाची माहिती घेतली तेव्हा रूमचे भाडे दुप्पट, ऑक्‍सिजनचे दर अधिक, डॉक्‍टर आणि परिचारिकांची व्हिजिट अशा वेगवेगळ्या माध्यमातून तब्बल एक लाख ६५ हजार रुपयांचे अवास्तव बिल दिले होते. केवळ ऑडिटर असल्यानेच बिल कमी होणे शक्‍य झाले. खासगी रुग्णालये रुग्णांकडून बिलांची अवास्तव आकारणी करीत असल्याचे पुन्हा एकदा सिद्ध झाले आहे.

हे पण वाचा - कोल्हापूरकरांसाठी दिलासादायक बातमी; राधानगरी धरणाचे दोन दरवाजे बंद

रक्षाविसर्जन दुसऱ्या दिवशी करा
सध्या पंचगंगा स्मशानभूमीसह इतरत्र जागा अपुरी आहे. त्यामुळे अंत्यसंस्कार केल्यानंतर दुसऱ्या दिवशीच रक्षाविसर्जन करावे, असे आवाहन आयुक्त डॉ. कलशेट्टी यांनी केले. रक्षाविसर्जन दुसऱ्या दिवशी केल्याने इतर मृतदेहांना जागा उपलब्ध होऊ शकते, त्यामुळे कोल्हापूकरांनी दुसऱ्या दिवशीच रक्षाविसर्जन करून सहकार्य करावे, असेही आवाहन डॉ. कलशेट्टी यांनी केले आहे.

 
संपादन- धनाजी सुर्वे