कोल्हापूर -  कोल्हापुरात कोरोनाचा कहर वाढत आहे. रोज सहाशे ते हजार रूग्ण सापडत आहेत. त्यामुळे प्रशासन कोरोनाविरोधात लढण्यासाठी जीवाचे राण करत आहे. परंतु, नागरिकांना त्याचे गांभिर्य नसल्याचे वारंवार समोर येत आहे. कोल्हापुरातही नुकतीच अशीच एक धक्कादायक घटना घडली आहे. क्वारंटाईन असूनही पिठाची गिरण आणि मिरची कांडप चालविल्याचा प्रकार समोर आला आहे. त्यामुळे संबंधित तरूणाला आज पाच हजाराच्या दंडाचा दणका बसला. महापालिका, जुना राजवाडा पोलिसांनी आज संयुक्तरित्या ही कारवाई केली. 

कोल्हापूर सध्या कोरोनाचा हॉटस्पॉट बनला आहे. कोरोनाचा प्रतिबंध करण्यासाठी महापालिका प्रशासनाने मास्क न लावता फिरणाऱ्यांवर कारवाईची धडक मोहीम हाती घेतली आहे. त्यात क्‍वारंटाईन असतानाही बाहेर अढळणाऱ्या व्यक्तींविरोधात तर पाच हजार रुपये दंडाची कारवाई सुरू केली. कारवाईवेळी संबधितांकडून प्रशासनाला कडाडून विरोध केला जात होता. त्यामुळे महापालिका प्रशासनाने कारवाईसाठी पोलिस प्रशासनाची मदत मागितली होती. एक वाहतूक पोलिस, पोलिस कर्मचारीसह दोन होमगार्ड असा बंदोबस्त पोलिसांकडून पुरविण्यात आला. 

हे पण वाचा - एकावं ते नवलच! बायकोची हौस पुरवविण्यासाठी केली चक्क या गोष्टींची चोरी

दरम्यान, आज आपटेनगर ते फुलेवाडी रिंगरोडवर एक क्वारंटाईन तरूण पिठाच्या गिरणीत काम करत असल्याची माहिती जुना राजवाडा पोलिसांना मिळाली. त्यांनी महापालिकेच्या पथकाच्या मदतीने गिरणीसह मिरची कांडपात काम करणाऱ्या संबधित तरूणावर पाच हजार रुपये दंडाची कारवाई केली. 

हे पण वाचा - ...त्यामुळे एका बापाला गळफास घ्यावा लागला, हेच दुर्दैव  

संपादन - धनाजी सुर्वे