घुणकी (कोल्हापूर) - राष्ट्रीय महामार्गावरील किणी येथील पथकर नाक्यावरील तपासणी केंद्रावर तपासणीसाठी वेळ लागत असल्याने वाहनांच्या रांगा लागत आहे. त्यामुळे प्रवाशांना भर उन्हात ताटकळत थांबावे लागत असल्याने संतापाच्या प्रतिक्रिया व्यक्त झाल्या. तपासणी केंद्राची संख्या वाढविण्याची गरज आहे. अन्यथा उद्रेक होण्याची शक्यता आहे.

पुणे बंगळूर महामार्गावरील

कोल्हापूर व सांगली जिल्ह्याच्या सिमेवरील कणेगांव (जि.सांगली) येथे परराज्यातील वाहनांची तपासणी करुन त्यांना किणी पथकर नाक्यावरुन वेगळ्या लेनमधून सोडले जाते. कोल्हापूर जिल्ह्यात जाणाऱ्या प्रवाशी वाहनांची तपासणी किणी (ता.हातकणंगले) येथील पथकर नाक्यावरील तपासणी केंद्रात केली जाते. मात्र वाहनांची संख्या प्रचंड असताना केवळ पाच ठिकाणी तपासणी केली जाते. तपासणीसही वेळ लागत असल्याने वाहनांच्या रांगा लागल्या आहेत. सकाळी आलेली वाहने दुपारी केंद्रावर  पोहचली. वाहनातील अबालवृध्दाना उन्हाच्या झळा सोसत रस्त्यावर थांबावे लागले. बालकांचे रडणे पालकांना घायाळ करीत होते. त्यामुळे अनेक पालकांनी रस्त्याच्या बाजूला असलेल्या झाडांचा आसरा घेतला.

तपासणी केंद्रात वाढ करावी

तपासणी केंद्रावर होणाऱ्या विलंबाबात प्रवाशांनी संतापाच्या प्रतिक्रिया व्यक्त केल्या. पहाटे पाच वाजता येऊनही दुपारी एक वाजता तपासणी केंद्रावर पोहचलो नसून सकाळ पासून सर्वजन उपाशी असून लहान मुलांची अवस्था दयनीय झाली आहे. तपासणी केंद्रात वाढ करून यापुढे येणाऱ्या प्रवाशांची गैरसोय टाळावी अशीही प्रतिक्रिया व्यक्त झाली.

वाचा - एक हजार रुपये भाड्यासाठी तो घेवून आला दोन महिलांना ; अन् त्या निघाल्या कोरोना पॉझिटीव्ह...

दरम्यान दुपारी जिल्हा पोलीस प्रमुख अभिनव देशमुख यांनी भेट सुचना दिल्या. जिल्ह्यातील कोरोना पाँझिटिव्हची संख्या वाढत असल्याने तपासणी केली जात आहे. प्रवाशांना त्रास होत आहे याची जाणीव आहे पण कोरोनावर नियंत्रणासाठी सहकार्य करावे असेही आवाहन त्यांनी केले.
घुणकी मार्गे वाहने जाऊ लागल्याने इथे पोलीस बंदोबस्त सुरू झाल्याने वाहन चालकांना किणी पथकर नाक्यावर   तपासणी शिवाय पर्याय राहिला नाही.