इचलकरंजी (कोल्हापूर) : बंदी असताना सर्वोच्च न्यायालयाचा निर्णय धाब्यावर बसवून शिरोळ तालुक्‍यातील जांभळी-हरोली गावच्या माळावर बैलगाडी शर्यतीचे आयोजन केले जात आहे. शनिवारी पहाटे लाखांच्या बक्षिसांची असणारी घोडा, बैलगाडी शर्यत घेऊन आयोजकांनी लाखोंची उलाढाल केली आहे. संपूर्ण महाराष्ट्रात बंदी असताना शिरोळ तालुक्‍यात सुरू असणाऱ्या बैलगाडी शर्यती पोलिसांपुढे आव्हान ठरले आहे. ‘दिवस उजाडला की शर्यत संपते’ असे विदारक चित्र या माळावर नित्याचेच झाले आहे.

हेही वाचा - दिवाळीचा बाजार अवघ्या 59 रुपयांत -

काही वर्षांपासून बैलगाडी शर्यतींवर महाराष्ट्रात बंदी असताना अनेक ठिकाणी बैलगाडी शर्यतीवर पोलिसांनी पायबंद घातला. मात्र, शिरोळ तालुक्‍यात बैलगाडी शर्यतींचे राउंड सुरूच आहे. तालुक्‍यातील जांभळी - हरोलीचा माळ शौकिनांना बैलगाडी शर्यतसाठी उत्तम आहे. छोट्या पद्धतीने शर्यतींचे आयोजन करण्याचे प्रमाण वाढले आहे. तालुक्‍यासह इतर ठिकाणचे आयोजक या माळावर शर्यतींचे आयोजन करतात.

मात्र, शनिवारी सकाळी झालेल्या बैलगाडी शर्यतीने पोलिसांनाच आव्हान दिले. प्रथम क्रमांकाला मोटारसायकल, दुसऱ्या क्रमांकास २५ हजार, तर तिसऱ्या क्रमांकाला अठरा हजार रोख बक्षीस होते. चार दिवस अगोदर आयोजकांनी शर्यतीचे नियोजन केले. कोणत्याही परिस्थितीत शर्यत होणारच, ही टॅगलाईन सोशल मीडियावरून प्रत्येक बैलगाडी शर्यतीला असते. यामुळे कायदा व सुव्यवस्था धोक्‍यात आली आहे. अशा बैलगाडी शर्यतींना लगाम घालून बैलगाडी शर्यती थांबवणे गरजेचे आहे.

हेही वाचा - अखेर तीन दिवसानंतर झाली त्याची सुटका -

जांभळी-हरोलीचा माळ हॉटस्पॉट

आठवडा उलटला की विशिष्ट दिवशी जांभळी - हरोलीच्या माळावर बैलगाडी शर्यत पाहायला मिळतात. कारवाईच्या भीतीने सकाळी सातच्या आत शर्यती आटोपल्या जातात. दिवसेंदिवस वाढणाऱ्या घोडा, बैल, शर्यतींमुळे हा माळ शर्यतींचा हॉटस्पॉट बनला आहे.

संपादन - स्नेहल कदम