राधानगरी (कोल्हापूर) : पाणलोट क्षेत्रातील अतिवृष्टीने जलाशय पाणीपातळीत वाढ झाल्याने राधानगरी धरणाचे चार स्वयंचलित दरवाजे आज पुन्हा खुले झाले. त्यातून 5712 तर वीजनिर्मितीसाठी सोडलेले 1440 असा एकूण 7112 क्‍यूसेस पाणी विसर्ग सुरु आहे. भोगावती नदीच्या पाणी पातळीत लक्षणीय वाढ झाली आहे.

यंदाच्या पावसाळ्यात स्वयंचलित दरवाजे खुले होण्याची गेल्या दहा दिवसातील तिसरी वेळ आहे. धरणाचे दोन स्वयंचलित दरवाजे सकाळी 10.30 तर, दोन दुपारी 4 वाजता खुले झाले. धरण क्षेत्रात 24 तासात 80 मिलिमीटर पाऊस झाला.

दरम्यान जलाशय पाणी पातळी स्थिर झाल्याने, काळम्मावाडी धरणाचे पाच ही वक्राकार दरवाजे सायंकाळी बंद करण्यात आले.सध्या पायथा विज गृहातून केवळ वीज निर्मितीसाठी एक हजार क्युसेस पाणी विसर्ग सुरू आहे.धरण क्षेत्रात 24 तासात 43 मिलिमीटर पाऊस झाला. धरण 83 टक्के भरले असून, पाणीसाठा 21 टीएमसी झाला आहे.धरण पूर्ण भरण्यास अद्याप साडेचार टीएमसी पाणीसाठा होणे बाकी आहे.