कोल्हापूर : ‘‘शेतीसाठी दिवसाला दहा तास वीज पुरवठा करावा या मागणीसाठी चक्का जाम आंदोलन करू तसेच ऊर्जामंत्री नितीन राऊत यांनीही चर्चेला बोलावले आहे. मात्र आंदोलन सुरू ठेवून चर्चेला जाणार आहोत.’’ अशी माहिती स्वाभिमानीचे नेते माजी खासदार राजू शेट्टी यांनी आज पत्रकार परिषदेत दिली.

आंदोलनाला राज्यभरातून पाठिंबा मिळत आहे. असे सांगून शेट्टी म्हणाले, ‘‘सकाळीच ऊर्जामंत्री राऊत यांनी फोनवर संर्पक केला आहे. त्यांनी चर्चेसाठी यावे असे सांगितले. संघटना चर्चेला तयार असते. मागणी मान्य होत नाही तोपर्यंत आंदोलन मागे घेतले जाणार नाही. बैठकीची तारीख लवकरच जाहीर होईल.’’

दरम्यान मागणी मान्य न झाल्यास टप्प्याटप्प्याने आंदोलन तीव्र करण्याचे जाहीर केले होते. त्यानुसार चक्का जाम आंदोलनाचे आवाहनही केले आहे. त्यानुसार ग्रामीण भागात आंदोलन होणार आहे. अशात एक दोन जिल्ह्यात दिवसा विजेची मागणीच नसल्याचे भासविण्याचा प्रयत्न केला जात आहे. मात्र त्यात तथ्य नसून शेतकऱ्यांना रात्रीचा वीज पुरवठा नको आहे. दिवसाच वीज पुरवठा द्यावा अशी मागणी परजिल्ह्यातील शेतकरीही करीत असल्याचे शेट्टी यांनी सांगितले.

विविध घटकांचा पाठिंबा

आंदोलनास विविध घटकांचा पाठिंबा मिळत असून निवृत्त पोलिस अधिकारी, कर्मचाऱ्यांनीही पाठिंबा दिला. जिल्हा बार असोसिएशननेही पाठिंबा देत आंदोलनात जितक्या केस दाखल होतील त्या मोफत चालविण्याचे आश्वासन दिले आहे. पेठवडगाव डॉक्टरांचे पथक सायकलवरून आले त्यांनीही पाठिंबा दिला. शेतकरी आंदोलकांना जेवण देत आहेत, असेही श्री शेट्टी यांनी सांगितले.

जाणीवपूर्वक दुर्लक्ष

शेतीसाठी दिवसा दहा तास वीज पुरवठ्याच्या मागणीसाठी स्वाभिमानीचे आंदोलन सुरू आहे. मात्र या आंदोलनाकडे जाणीवपूर्वक दुर्लक्ष केले जात आहे, दोन मंत्री येथे भेट देऊन गेले. ऊर्जामंत्र्यांनी आज तुम्ही चर्चेला का येत नाही असे फोन विचारले तेव्हा आम्ही चर्चेला तयारच असल्याचे सांगितले. मात्र मागणी मान्य होई पर्यंत आंदोलन सुरूच ठेवणार असल्याचे ही सांगितल्याचे श्री. शेट्टी यांनी सांगितले.