इचलकरंजी : शहरातील 33 खासगी रुग्णालयातील 80 टक्के बेड आता कोविड आणि नॉन कोविड रुग्णांसाठी आरक्षित केले आहेत. याबाबतचा आदेश आज मुख्याधिकारी दीपक पाटील यांनी दिला आहे. यावर वेगवेगळ्या प्रकारचे नियंत्रण ठेवण्यासाठी स्वतंत्र अधिकाऱ्यांची नियुक्ती केली आहे. 

सध्या शहरात कोरोनाचा कहर सुरू आहे. दररोज रुग्णसंख्या वाढत आहे. त्यामुळे आयजीएम रुग्णालयावर ताण वाढत आहे. त्यामुळे रुग्णांचे हाल होत आहेत. त्यासाठी शासनाच्या निर्देशानुसार व जिल्हाधिकाऱ्यांच्या आदेशानुसार शहरातील खासगी रुग्णालयातील बेड अधिग्रहीत करण्याची प्रक्रिया पालिका प्रशासनाकडून सुरू केली आहे. दहापेक्षा जास्त बेड असलेली शहरात एकूण 33 रुग्णालये आहेत. या रुग्णालयातील 80 टक्के बेड हे कोविड आणि नॉन कोविड रुग्णांसाठी आरक्षित केले आहेत.

इतर 20 टक्के बेड हे संबंधित रुग्णालयाच्या अधिकार कक्षेत असणार आहेत. 
प्रारंभी सर्वच रुग्णालयातील बेड अधिग्रहीत करण्याचे आदेश होते. त्यानुसार 75 रुग्णालयांची यादी पालिका प्रशासनाकडून तयार केली होती. मात्र, जिल्हाधिकाऱ्यांच्या सुधारित आदेशानुसार 10 बेडपेक्षा जास्त बेड असणारी 33 रुग्णालये आहेत.

या रुग्णालयांना मुख्याधिकारी दीपक पाटील यांनी नोटीस काढून 80 टक्के बेड आरक्षित करण्याचे आदेश दिले आहेत. यावर नियंत्रण ठेवण्यासाठी यंत्रणा कार्यान्वित केली आहे. यामध्ये समन्वयक अधिकारी, बेड व्यवस्थापक अधिकारी, तसेच बिल पडताळणी अधिकारी यांची नियुक्तीही केली आहे. 

दर्शनी भागात माहिती फलक 
खासगी रुग्णालयाच्या दर्शनी भागात 80 टक्के कोविड व नॉन कोविड रुग्णांसाठी आरक्षित बेडबाबत माहिती फलक लावण्याची सूचना दिली आहे. यामध्ये आरक्षित बेड व रिक्त बेडची संख्या फलकावर स्पष्टपणे नमूद करण्याचा आदेशही मुख्याधिकारी पाटील यांनी दिला आहे. 

संपादन - सचिन चराटी