कंदलगाव (कोल्हापूर): कोल्हापूरातीत खासगी दवाखान्यात ११ महिन्यापूर्वी दोन चिमुकल्या बाळांना जन्म देऊन 'ऋतुजा' कोमामध्ये गेली. प्राथमिक स्थितीत आवश्‍यक उपचार मिळाले नसल्याने ऋतुजावर ही वेळ आली असल्याचे नातेवाईकांनी सांगितले.

पाचगाव येथील हनुमान नगरात माहेर असलेल्या ऋतुजाचा ३० डिसेंबर २०१८ ला गारगोटीतील रोहित पाटीलशी विवाह झाला. गुण्यागोविंदाने नांदणाऱ्या या संसारात दोन चिमुकली जन्म घेणार या आनंदात असणाऱ्या ऋतुजाला कोल्हापुरातीस एका दवाखान्यात बाळंतपणासाठी उपचार सुरू केले. मात्र प्राथमिक स्थितीतले उपचार योग्य रितीने झाले नसल्याने ऋतुजा कोमात आहे. पती रोहित व नातेवाईक तिला कोमातून बाहेर काढण्यासाठी वणवण भटकत आहेत. या खर्चाचा भार दिवसेंदिवस वाढत आहे. रोहितचा गोकुळ शिरगाव येथील लघू फौंड्रीचा उद्योग कोरोनाकाळात थंडावला असल्याने त्यांनी पत्नी ऋतुजावर सध्या घरीच उपचार करण्याचे ठरविले आहे.

चिमुकल्यांना मिळेल का मायेची ऊब...

ऋतुजाने श्रीशा व श्रीराज या दोन बाळांना जन्म दिला. ११ महिन्यापासून आई जवळ घेईल, या आशेने हात-पाय हालवित मातेच्या ऊबीला झोपलेली असतात. परंतु, तरी त्यांची माय कोमातून बाहेर आली नाही.

कोल्हापूरकरांचे दातृत्व आभाळाऐवढे...

ऋतूजा कोमात असलेली बातमी कोल्हापूरकरांच्या कानावर पडली आणि सुरू झाले दातृत्व. पाचगावचे माजी सरपंच चंद्रकांत कांडेकरी, जिजा वेल फेअरच्या नेहा देसाई, डॉ. स्नेहलदत्त खाडे यांच्यासह अनेकांनी दातृत्वचा हात पुढे केल्याने काही प्रमाणात सध्या उपचार सुरू आहेत. मात्र, अजूनही उपचारासाठी मोठा खर्च असल्याने कोल्हापूरकर आपला वसा सोडणार नाहीत अशी आशा रोहितने बोलून दाखविली.