आटपाडी : कौठूळी (ता.आटपाडी) ग्रामपंचायतीचे उपसरपंच सुभाष पाटील यांचा आटपाडी ते दिघंची रस्त्यातवर दोन मोटर सायकलची धडक होऊन झालेल्या अपघातात जागीच मृत्यू झाला. ही घटना आज सायंकाळी पाच वाजता घडली.

सुभाष पाटील हे सांगली जिल्हा मध्यवर्ती बँकेची बाजार समिती जवळील शाखेत शाखाप्रमुख म्हणून कार्यरत होते. तसेच गेल्या वर्षी झालेली ग्रामपंचायत निवडणुक त्यांनी लढवली होते. ते कौठळी गावच्या उपसरपंच पदावर कार्यरत होते.

आज नेहमीप्रमाणे बँकेचे काम संपवून सायंकाळी आटपाडी दिघंची रस्त्यावरून गावाकडे निघाले होते. सावित्रीदेवी इंडस्ट्रीजवळून त्यांच्या वस्तीकडे रस्ता जातो. तिथे मोटरसायकल वळवून गावच्या रस्त्याकडे जाताना दिघंचीहून येणाऱ्या दुचाकी गाडीने त्यांच्या गाडीला जोरात धडक दिली.

मोटर सायकलची धडक अत्यंत भीषण होती. अपघात स्थळापासून शंभर फुटावर मोटरसायकल पडली होती. या अपघातात सुभाष पाटील गंभीर जखमी झाले होते. त्यांना तातडीने शासकीय ग्रामीण रुग्णालयात उपचारासाठी हलवले. मात्र उपचारापूर्वीच ते मयत झाले होते.