अंकली : वारकरी सांप्रदायासह प्रत्येक भाविकांच्या जिव्हाळ्याचा विषय असलेल्या माऊलींच्या अश्वांचे प्रस्थान सोहळा एकीकडे लॉकडाउनच्या नियमांचे पालन तर दुसरीकडे वंशपरंपरागत चालत अालेले  रितीरिवाज यांचा सुवर्णमध्य साधत पार पाडणार असल्याची माहिती श्रीमंत ऊर्जितसिंह शितोळे सरकार यांनी अंकली येथील राजवाड्यात आज (ता. २) प्रस्थान विधीप्रसंगी दिली.
 

दरवर्षी आषाढीवारीसाठी अंकली (ता. चिक्कोडी) येथून श्रीमंत शितोळे सरकार यांच्या माऊलींचा मानाच्या अश्वांचा अंकली-आळंदी असा प्रवास घडत. यावर्षी कोरोनामुळे  नियमांचे बंधन घालण्यात आल्याने प्रवास करणे शक्य नसले तरी परंपरागत रितीरिवाजांचा मान राखून प्रस्थानाचे सर्व विधी पार पाडण्यात आले. 

अंकलीकर शितोळे सरकार यांच्या राजवाड्यात सकाळी ११ वाजता अंबाबाई मंदिरात पूजन, आरती व जरीपटक्याचे पूजन करण्यात आले.  दोन्ही अश्वांचे श्रीमंत ऊर्जितसिंह शितोळे सरकार व महादजीराजे शितोळे सरकार यांच्या हस्ते पूजन करण्यात आले. विहानराजे शितोळे सरकार व निवडक वारकरी यावेळी उपस्थित होते. दिंडी व  दोन्ही अश्व राजवाड्याबाहेर येताच भाविकांनी पाणी घालून ओवाळणी करून दर्शन घेतले.  

वारीची परंपरा अबाधित राखणार 

शितोळे सरकार घराण्याची माऊलीच्या अश्वांची परंपरा १८८ वर्षांची आहे. शितोळे घराण्याच्या अनेक पिढ्या वारी करत आहेत. चालत आलेल्या परंपरा खंडीत न करता आम्ही प्रातिनिधिक स्वरूपात अंकली येथे चालवणार आहोत. येथे विठ्ठल व ज्ञानेश्वर मंदिर आहे. या ठिकाणी वारी काळात चालणाऱ्या सर्व विधींची पूर्तता करणार असून काळानुरूप घडणारे बदल स्वीकारून वारीची परंपरा अबाधित राखणार असल्याची माहिती श्रीमंत उर्जितसिंहराजे शितोळे सरकार यांनी दिली.

हे पण वाचा - जाणून घ्या! महापुरासह अतिवृष्टीच्या लाटा झेलणाऱ्या कोल्हापूर बंधाऱ्यांविषयी... 

अंकली ही प्रति आळंदी

अंकली गावास शितोळे सरकार घराण्याकडून भक्तीचा वारसा लाभला आहे. माऊलींच्या अश्वाचे वास्तव्य या ठिकाणी असल्याने गावास प्रति आळंदीचे स्वरूप प्राप्त झाले आहे. यावर्षी परिस्थितीनुसार वारीचे विधी येथेच पार पडणार असल्याचे श्रीमंत महादजीराजे शितोळे सरकार यांनी सांगितले.

हे पण वाचा -  महाराष्ट्रातून कर्नाटकात येणाऱ्यांसाठीच वेगळे नियम का?