SARTHI Research Fellowship:‘सारथी’च्या सरसकट संशोधक विद्यार्थ्यांना ‘बार्टी’प्रमाणे विद्यापीठ नोंदणी दिनांकापासून फेलोशिप द्यावी, यासह विविध मागण्यांसाठी सारथी कृती समितीने आंदोलन पुकारले आहे. याअंतर्गत संशोधक विद्यार्थ्यांनी सारथीच्या कोल्हापुरातील उपकेंद्रासमोर बेमुदत साखळी उपोषण आजपासून सुरू केले. न्याय मिळेपर्यंत उपोषण करण्याचा निर्धार आंदोलनकर्त्या विद्यार्थ्यांनी केला आहे.

उपोषणाच्या माहितीचे निवेदन विद्यार्थ्यांनी सारथी उपकेंद्राच्या सहव्यवस्थापकीय समन्वयक किरण कुलकर्णी यांना दिले. २०२३ मधील पात्र संशोधक विद्यार्थ्यांना तत्काळ सरसकट फेलोशिप द्यावी, बार्टीप्रमाणे विद्यापीठ नोंदणी दिनांकापासून फेलोशिप मिळावी, सारथी कृती समिती शिष्टमंडळाची बैठक मुख्यमंत्र्यांसोबत घडवून आणावी, अशा प्रमुख मागण्या आहेत. त्यांनी ‘एक मराठा लाख मराठा’, ‘सारथी वाढवा मराठा घडवा’, ‘सरसकट हवी सारथी फेलोशिप’, अशा घोषणा दिल्या.

आंदोलनात संभाजी खोत, अभय गायकवाड, सुहास रोमणे, प्रियांका पाटील, स्नेहल करपे, ममता जगताप, वैष्णवी पाटील, सनदकुमार खराडे, ऋषीराज भोसले, अमृता पाटील, तेजश्री जाधव, भाग्यश्री देसाई, अंजली शेळके आदी उपस्थित होते. दरम्यान, भाजपचे पश्‍चिम विभागीय सहसंयोजक हेमंत पाटील यांनी निवेदन स्वीकारले. उच्च व तंत्रशिक्षणमंत्री चंद्रकांत पाटील यांच्याशी चर्चा करून मागण्यांच्या पूर्ततेबाबत सकारात्मक प्रयत्न करू, असे त्यांनी सांगितले.

न्याय मिळेपर्यंत उपोषण
मागण्या ‘सारथी’च्या व्यवस्थापकीय संचालकांना कळविल्या आहेत. पूर्ततेबाबत पाठपुरावा होईल. उपोषण थांबविण्याचे आवाहन किरण कुलकर्णी यांनी केले. त्यावर शासनाकडून जोपर्यंत पूर्ततेबाबत न्याय आणि लिखित स्वरूपात ग्वाही मिळत नाही, तोपर्यंत उपोषण सुरूच ठेवण्याचा निर्णय विद्यार्थ्यांनी घेतल्याचे कृती समितीचे अध्यक्ष संभाजी खोत यांनी सांगितले. (Latest Marathi News)