कोल्हापूर : जिल्हा परिषदेच्या प्राथमिक व माध्यमिक शाळांच्या (Schools) शैक्षणिक दर्जातील सुधारणा करण्याकरिता शासनाने अभ्यासगट निर्माण केला आहे. औरंगाबाद चे जिल्हाधिकारी सुनील चव्हाण (Sunil Chavhan) यांच्या अध्यक्षतेखाली हा अभ्यासगट तयार केला असून यात जिल्हा परिषदेचे मुख्य कार्यकारी अधिकारी संजयसिंह चव्हाण तसेच कागलचे गट शिक्षणधिकारी गणपती कमळकर यांचा समावेश करण्यात आला आहे.

ग्राम विकास विभागाने हा निर्णय घेतला आहे. मात्र समिती सदस्यांच्या प्रवासाचा खर्च मात्र जिल्हा परिषद स्वनिधितून करावा लागणार आहे. दिल्ली सरकाराच्या दिल्ली निगम अंतर्गत येणाऱ्या सर्व शाळांमध्ये काळानुरूप शैक्षणिक गुणवत्ता वाढीसाठी मोठया प्रमाणावर बदल व सुधारणा झालेल्या आहेत.

या शाळांमध्ये विद्यार्थ्यांना शिकविण्याकरिता वापरण्यात येणारे तंत्रज्ञान, विद्यार्थ्यांकरिता व शिक्षकांकरिता असणाऱ्या सुविधा, विद्यार्थ्यांचे आचार-विचार व शिस्त तसेच शिक्षकांच्या शिकविण्याची कार्यपध्दती या सर्व गोष्टींचा सखोल अभ्यास करण्याकरिता तज्ञ मंडळीचा अभ्यासगट तयार करण्यात आला आहे. ही समिती दिल्ली येथील सरकारी शाळांना भेटून त्याबाबतचा अहवाल शासनास देणार आहे.