बेळगाव - कोरोनाची लागण झालेल्या रूग्णांच्या थेट संपर्कात न आलेल्या पण दुय्यम संपर्क (सेकंडरी कॉन्टॅक्ट) म्हणून ओळखल्या जाणाऱ्यांच्या घशातील स्त्रावाची तपासणी केली जाणार आहे. बेळगाव शहरात महापालिका व आरोग्य विभागाने शुक्रवारी (ता.24) ही मोहीम सुरू केली आहे. सेकंडरी कॉन्टॅक्ट म्हणून ओळखल्या जाणाऱ्यांची सुमारे 150 जणांची यादी तयार करण्यात आली आहे. त्यांचा शोध घेवून त्यांच्या घरी जावून त्यांच्या घशातील द्रव घेतले जात आहे. कोरोना रूग्णाच्या थेट संपर्कात आलेल्या सर्वांच्या घशातील स्त्रावाची तपासणी केली जाते. पण त्यांच्या थेट संपर्कात नसलेले व सेकंडरी कॉन्टॅक्ट म्हणून ओळखले जाणारे होम क्वारंटाईन करून ठेवले जात होते. पण जिल्ह्यात या सेकंडरी कॉन्टॅक्टच्या माध्यमातूनही काही जणांना कोरोनाचा संसर्ग झाल्याचे निदर्शनास आले. त्यामुळे मग त्यांना शोधून त्यांच्या आरोग्याची तपासणी केली जात आहे. बेळगाव तालुक्यातील ज्या गावांमध्ये कोरोनाचे रूग्ण सापडले आहेत, त्यांची तपासणी गुरूवारपासूनच सुरू झाली आहे. आता शहरात ही मोहीम सुरू झाली आहे.
महापालिका प्रशासनानेच पुढाकार
बेळगाव जिल्ह्यातील कोरोना रूग्णांची संख्या शुक्रवारी 45 झाली. पण त्यातील बहुतेक रूग्ण हे रायबाग व बेळगाव तालुक्यात आहेत. बेळगाव शहरात सात रूग्ण आहेत. त्यापैकी सर्वाधिक म्हणजे 4 रूग्ण हे कॅन्टोनमेंट बोर्डाच्या हद्दीत आहेत. पण शहरात कोरोनाचा फैलाव होवू नये यासाठी महापालिका प्रशासनानेच पुढाकार घेतला आहे. आरोग्य विभाग व महापालिकेच्या अधिकारी तसेच कर्मचाऱ्यांनी निर्बंधित क्षेत्रात जावून प्रत्येक घराचे सर्वेक्षण सुरू केले आहे. आशा कार्यकर्त्यांकडेही सर्वेक्षणाची जबाबदारी देण्यात आली आहे. पहिल्या टप्प्यात केवळ कोरोनाग्रस्ताच्या थेट संपर्कात आलेल्यांची आरोग्य तपासणी करण्यात आली. त्यांना शहरातील लॉजमध्ये क्वारंटाईन करण्यात आले. त्यांना जिल्हा रूग्णालयात नेवून त्यांच्या घशातील स्त्रावाची घेण्यात आला. त्या द्रावाचा अहवाल येईपर्यंत त्याना क्वारंटाईन करून ठेवण्यात आले.
दुय्यम संपर्कात आलेल्यांबाबत प्रशासन फारसे गंभीर नव्हते. त्याना केवळ होम क्वारंटाईन केले जात होते. पण त्यांच्याकडून होम क्वारंटाईनच्या नियमांचे पालन होते का? याची दक्षता घेतली जात नव्हती. पण आता त्यांच्याकडेच प्रशासन गांभिर्याने लक्ष देणार आहे. शहरातील आझाद गल्ली, अमननगर, आझमनगर व कॅंप परीसरात दुय्यम संपर्कातील नागरीकांची संख्या जास्त आहे. गेल्या दोन दिवसांपासून त्यांची यादी तयार करण्याचे काम सुरू होते. कोरोना रूग्ण आढळून आलेल्या जागा व त्याच्या लगत असलेला परीसर येथेही दुय्यम संपर्कातील नागरीक आहेत. त्यामुळे त्यांच्या घरी जावून त्यांच्या घशातील द्राव घेतला जात आहे. बेळगावातच प्रयोगशाळा सुरू झाल्यामुळे आता त्याची तपासणीही लवकर होवून अहवाल प्राप्त होणार आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.