इचलकरंजी - आयपीएलमधील मुंबई इंडियन्स विरुद्ध दिल्ली कॅपिटल यांच्यातील अंतिम सामन्यावर बेटिंग (सट्टा) घेत असतांना शहरात मंगळवारी रात्री दोन ठिकाणी छापे टाकले. दोन्ही कारवाईत सात जणांना अटक केली असून एक पसार झाला आहे. इचलकरंजी स्थानिक गुन्हे शाखा व पोलिस उपअधीक्षक यांच्या पथकांने ही कारवाई केली. 

दाते मळा परिसरात सचिन रानडे यांच्या शेडमध्ये क्रिकेटवर बेटिंग (सट्टा) घेतला जात असल्याची माहिती पोलिस उपअधीक्षक बी. बी. महामुनी यांना मिळाली. त्यानुसार छापा टाककून लाईव्ह गुरु या ऍपच्या माध्यमातून बेटिंग घेण्यात येत असल्याचे उघडकीस आले. 

कारवाईत नंदकुमार तुकाराम बारवाडे (सरस्वती मार्केट) व रनिश रतन दरक (तांबे माळ, वसंत कॉलनी) यांना ताब्यात घेतले. त्यांनी महेश शिवगोंडा पाटील (जुना चंदूर रोड) याच्यासाठी बेटिंग घेत असल्याचे कबूल केले. या प्रकरणी पाटील यालाही पोलिसांनी अटक केली. या शिवाय शितल मनोहर कुडचे (जनता चौक) याचे नाव निष्पन्न झाल्यांने त्यालाही अटक केली. बेटिंग घेत असलेले ठिकाणी स्नुकर पार्लर सुरू होते. हा या पार्लरचा मालक आहे. कारवाईत 2500 रुपये रोख, तीन मोबाईल, मोटारसायकल व मोपेड असा 2 लाख 57 हजार 500 रुपयांचा मुद्देमाल जप्त केला. एस.एम. पाटील, एस.ए. हारगुले, एस.बी. शेख यांच्या पथकांने ही कारवाई केली. 

हे पण वाचा - विद्यार्थ्यांनी बनविले सौर उर्जेवरील दिवे ; शंभर दिव्यांनी राजवाडा उजळणार

गोकूळ चौकात चौघांवर गुन्हा 
इचलकरंजी स्थानिक गुन्हे शाखेने गोकुळ चौक येथे छापा टाकून मोबाईसह 24 हजारांचा मुद्देमाल जप्त केला. यामध्ये चौघांवर गुन्हा नोंद करून तिघांना अटक केली. रहिमतुल्ला साहेबजी आंबी (गोकुळ चौक), सुरेश शिवशंकर माळी (तोडकर मळा), शकिल मेहबुब चुवेवाले (बांबू गल्ली) यांना अटक केली. मुख्य संशयित नादीर शेख (रा. मिरज) पसार झाला आहे. 

संपादन - धनाजी सुर्वे