शिरोळ - तालुक्‍यामध्ये दहा दिवसांत तब्बल पन्नास कोरोनाबाधित रुग्ण यामध्ये दोघांचा कोरोनामुळे मृत्यू झाला आहे. कोरोना रुग्णांचा वाढीचा आलेख पाहता शिरोळ तालुका हॉटस्पॉट बनण्याची शक्‍यता आहे. तालुका कंटेन्मेंट झोनमध्ये जाऊ नये यासाठी नागरिकांनी दक्ष राहणे गरजेचे आहे. शासनाने कोरोना संसर्ग रोखण्यासाठी घातलेल्या नियमांचे उल्लंघन करणाऱ्यांवर कठोर कारवाई करण्याची आवश्‍यकता आहे.

हेही वाचा- उद्या ठरणार इचलकरंजीच्या लॉकडाऊनबाबतची दिशा

शिरोळ तालुक्‍यालगत इचलकरंजी शहर तसेच कर्नाटकातील सीमा भाग व सांगली, मिरज शहरांचा समावेश आहे. शिरोळ तालुक्‍याभोवती असलेल्या शहरांच्या व कर्नाटक सीमा भागामुळे दहा दिवसांत तब्बल पन्नास नवे रुग्ण सापडले आहेत. यामध्ये नांदणी व जयसिंगपूर येथील दोन कोरोनाबाधित रुग्णांचा मृत्यूही झाला आहे. 11 रुग्ण बरे होऊन घरी गेले आहेत. कुरुंदवाड, मजरेवाडी परीसरात तब्बल 25 रुग्ण आढळले आहेत. जयसिंगपूर तसेच शिरोळमध्येही कोरोनाबाधित रुग्णांच्या संख्येत वाढ होत असल्याने नागरिक भयभीत होत असले तरी अनेक जण विनाकारण रस्त्यावर फिरत आहेत. शिरोळ तालुक्‍यामध्ये कोरोनाचा वाढता आलेख पाहता याला ब्रेक लावण्यासाठी गावातील दक्षता समितीने दक्ष राहून नागरीकांचे प्रबोधन करणे गरजेचे आहे.

हेही वाचा- कोरोना जाण्यासाठी मंत्र्यांचे ट्विटरवरून साकडे

शिरोळ तालुक्‍यामध्ये दहा दिवसांत रुग्णांच्या संख्येत वाढ होत आहे ही बाब आरोग्याच्या दृष्टीने चिंताजनक आहे. प्रत्येकाने सुरक्षित अंतर ठेऊन गरजेनुसार घराबाहेर पडावे, बीपी, शुगर यासारखे आजार असणाऱ्या नागरिकांनी तसेच वृद्धांनी कोरोनाचा संसर्ग टाळण्यासाठी घराबाहेर पडू नये. सामाजिक बांधिलकी म्हणून युवकांनी कोरोनाची गंभीरता लक्षात घेऊन प्रबोधनात सामिल न झाल्यास कोरोनाच्या साखळीला ब्रेक लागणार नाही.
- सौ. अपर्णा मोरे-धुमाळ, तहसीलदार, शिरोळ

संपादन - अमरसिंह घोरपडे