कोल्हापूर : आमदार चंद्रकांत पाटील आंबा पडल्यासारखे मोठे झाले असल्याची टीका राज्य नियोजन मंडळाचे कार्यकारी अध्यक्ष राजेश क्षीरसागर यांनी आज येथे केली. 

त्यांनी पंतप्रधान नरेंद्र मोदी यांनी मीडियाला बाईट दिला का? असा प्रश्‍नही उपस्थित करत श्री. पाटील यांनी दोन दिवसांपूर्वी ठाकरे यांच्यावर केलेल्या आरोपाला प्रत्त्युतर दिले. 

सीपीआरमध्ये बेड व कपाट वितरण कार्यक्रम झाल्यानंतर त्यांनी पत्रकारांशी संवाद साधला. 

क्षीरसागर म्हणाले, ""मुख्यमंत्री ठाकरे यांचे काम राज्यातील सर्वसामान्य जनतेला माहीत आहे, याची जाणीव पाटील यांना असायला हवी. मातोश्रीवर टीका करणाऱ्यांचा शेवट कसा होतो, याचे उत्तम उदाहरण नारायण राणे आहेत. त्यामुळे टीकाकारांनी हा इतिहास लक्षात घेऊन बोलावे. पाच वर्षांत दिंडोरा पिटून राज्यकारभार होत नाही. भाजपच्या मुख्यमंत्र्यांनी पाच वर्षात जसा डांगोरा पिटला तसा ठाकरे पिटणार नाहीत. पाटील यांची ठाकरे यांनी राज्यभर फिरावे, अशी इच्छा असेल. पण, मुख्यमंत्री म्हणजे काय असतो, त्याने काम कसे करावे, हे ठाकरे यांनी कामातून दाखवून दिले आहे.''

हे पण वाचा - त्याने १४ वर्षे दिली झुंज, 'तो' म्हणायचा मी दहावी पास होणारच... पण नियतीला ते मान्य नव्हतं अन् शेवटी... 

ते म्हणाले, ""गेल्या तीस वर्षांत मातोश्रीवरील नेत्यांनी कधीही मीडियाला बाईट दिलेला नाही. ते सामनातून व्यक्त होत असतात. मुख्यमंत्री उद्धव ठाकरे शांत व संयमाने कोरोनावर मात करण्यासाठी झटत आहेत. त्यांच्यावरील टीकेने त्यांना कोणताच फरक पडणार नाही. पाटील यांनी ते पूर्वी काय होते व मोठे कसे झाले, याचे परीक्षण करावे. माणूस जसा मोठा होतो तसे त्याला पायदळी यायला वेळ लागत नाही.'' अशी टीकाही क्षीरसागर यांनी केली. 

संपादन - धनाजी सुर्वे