कोल्हापूर : अंबाबाई मंदिर पाडव्यादिवशी मर्यादित वेळेत सुरू ठेवण्यात येईल. त्यानंतर मंदिरे नियमितपणे सुरू करण्यासंदर्भात देवस्थान समितीतर्फे उद्या महत्त्वाच्या घटकांची बैठक घेणार आहे. त्यात दर्शन सेवेबाबत अंतिम निर्णय घेण्यात येणार आहे, अशी माहिती पश्‍चिम महाराष्ट्र देवस्थान समितीचे अध्यक्ष महेश जाधव यांनी आज दिली.

हेही वाचा -  संपत्तीच्या हव्यासाने घुबडांची सांगली, सोलापूर, कोल्हापूर, बेळगावात तस्करी -

कोरोना संसर्ग टाळण्यासाठी राज्यभरात लॉकडाउन होता. त्यामुळे सात महिने मंदिरे बंद राहिली आहेत. आता राज्य शासनाने सोमवारपासून मंदिर खुली करण्यास मान्यता दिली आहे. त्याचाच भाग म्हणून पाडव्यादिवशी अंबाबाई मंदिर, जोतिबा मंदिर मर्यादित वेळेत सुरू राहील. त्यानंतर मंदिर नियमित सुरू ठेवण्यासंदर्भात देवस्थान समिती बैठक घेईल. त्यात भाविकांनी काय काळजी घ्यावी, ते एकावेळी किती भाविकांना प्रवेश द्यायचा, आदी बाबत नवी नियमावली तयार केली जाईल. त्याची माहिती जिल्हाधिकाऱ्यांना दिली जाईल. त्यानंतर सर्वानुमते मंदिरे नियमित सुरू होतील, अशी माहिती सूत्रांकडून देण्यात आली. 

जिल्हाधिकारी दौलत देसाई म्हणाले, लॉकडाउनमध्ये बंद असलेली जिल्ह्यातील मंदिर उघडण्याबाबत शासनाचे जे निर्देश येतील, त्यानुसार त्याची अंमलबजावणी केली जाईल. मात्र, कोरोना प्रतिबंधात्मक नियमांची काटेकोर अंमलबजावणी प्रत्येकालाच करावी लागणार आहे. जिल्हा प्रशासनातर्फे त्यासाठीच्या आवश्‍यक सूचनाही मंदिर व्यवस्थापनांना दिल्या जातील. दरम्यान, शासनाच्या सर्व नियमांचे आम्ही योग्य पद्धतीने पालन करू, असे जोतिबा मंदिर अधीक्षक महादेव दिंडे यांनी सांगितले.

हेही वाचा - शेतकऱ्यांना दिलासा ; एकाच दिवसात दहा टन झेंडुच्या फुलांची विक्री -

"पश्‍चिम महाराष्ट्र देवस्थान समितीच्या अखत्यारीतील श्री अंबाबाई, जोतिबा मंदिराबरोबरच सर्व मंदिरे बंद होती. शासनाच्या निर्देशानुसार ती आता उघडतील; पण लगेचच मंदिरांत गर्दी करून चालणार नाही. तोंडावर मास्क व इतर नियम पाळावेच लागतील. याबाबत उद्या नियमावली जाहीर केली जाणार आहे."

- महेश जाधव, अध्यक्ष, देवस्थान समिती

संपादन - स्नेहल कदम