कोल्हापूर - ‘साहेब.. नाहीत.’ ‘कुठे गेलेत?’ ते इचलकरंजीला गेलेत. ‘त्यांचा पदभार कोणाकडे आहे किंवा दुसरे वैद्यकीय अधिकारी कुठे आहेत?’ ‘काही माहिती नाही.’ ‘साहेब कधी येतील?’ ‘काही सांगता येत नाही,’ अशी उत्तरे आज जिल्हा शल्यचिकित्सक कार्यालयात येणाऱ्या लोकांना ऐकायला मिळाली.

इचलकरंजीतील कोरोना नियंत्रणात आणण्यासाठी शल्य चिकित्सकांनी आयजीएम रुग्णालयात जाण्याचे आदेश जिल्हाधिकाऱ्यांनी दिले. त्यानुसार शल्य चिकित्सक आयजीएम रुग्णालयाकडे गेले. त्यासोबत आज निवासी वैद्यकीय अधिकारी व २२ कर्मचाऱ्यांनाही इचलकरंजीला बोलवले. त्यामुळे शल्य चिकित्सक कार्यालयात प्रशासकीय कामांचा खोळंबा झाला. अनेक लोक वैद्यकीय बिले किंवा अन्य वैद्यकीय कागदपत्रांसाठी येथे येत होते. मात्र साहेबही नाहीत, मॅडमही नाहीत आणि कर्मचारीही नाहीत, असे चित्र शल्यचिकित्सक कार्यालयात होते. त्यामुळे शल्यचिकित्सकांच्या बंद केबिनवर लावलेली चिठ्ठी वाचून लोक परत जात होते.

वाचा - कोणता आहे हा भयानक आ़जार हाता पायांना येतेय सूज 

शल्य चिकित्सक नसतील अन्य कोणत्या अधिकाऱ्यांकडून कामेकरून घ्यावीत, याचे नेमके उत्तर मिळत नसल्याने लोकही गोंधळात पडले. ही बाब विचारात घेता किमान निवासी वैद्यकीय अधिकाऱ्यांनी तरी त्यांच्या कक्षात उपस्थित असणे महत्वाचे आहे, अशी अपेक्षा लोकांकडून व्यक्त होत होती.

संपादन - मतीन शेख