कोल्हापूर - सुभाषनगर चौकातील झाडाखालीच उघड्यावर सुरू असलेल्या मटका अड्ड्यावर छापा टाकण्यासाठी गेलेल्या पोलिसांवरच संशयितांनी जोरदार दगडफेक केली. दगडफेक करत पळून जाणाऱ्या या संशयितांनी पोलिसांना अर्वाच्च शिवीगाळही केली. या प्रकरणी तिघांवर राजारामपुरी पोलिस ठाण्यात गुन्हा नोंदवण्यात आला असून त्यांच्याकडून मोबाईलसह 11 हजारांचा मुद्देमाल जप्त करण्यात आला. 

विष्णू काशिनाथ माने (वय 60, रा. बालाजी पार्क, आयसोलेशन हॉस्पिटलच्या मागे), विजय युवराज बागडे (वय 31, रा. जुना कंदलगांव नाका) आणि योगेश अभंगे (वय 42, रा. अमळनेर, जि. नगर) अशी संशयितांची नांवे आहेत. या तिघांकडून रोख पाच हजार 260 रूपये व मोबाईल मिळून 11 हजाराचा माल जप्त करण्यात आला.

 
सुभाषनगर चौकातील झाडाखाली उघड्यावर मोबाईलद्वारे कल्याण मटका सुरू असल्याची माहिती पोलिसांना मिळाली. या माहितीच्या आधारे पोलीस या परिसरात कारवाईसाठी गेले होते. पोलिसांनी आपली ओळख सांगताच या संशयितांनी तिथून पळ काढला. पळून जाताना रस्त्यावरील दगड या पोलिसांच्या अंगावर भिरकावले, त्याचबरोबर पोलिसांना अर्वाच्च शिवीगाळही करण्यात आली.

हे पण वाचा -  "चंद्रकांतदादांनी मला आयुष्यातून उठवण्याचा प्रयत्न केला"

विष्णू माने आणि विजय बागडे यांना पळून जाताना ताब्यात घेण्यात आले. त्यांनी मूळ मालक योगेश अभंगे असल्याचे सांगितले. या तिघांवरही गुन्हा दाखल झाला असून अधिक तपास पोलीस करत आहेत.

हे पण वाचा - हद्‌पारीचे यंदा पोलिसांना नो टेन्शन

संपादन - धनाजी सुर्वे