हुपरी - शेतातील बोअरची नोंद बारा पत्रकी घालण्यासाठी दोन हजार रूपयांची लाच स्विकारताना येथील सज्जाचा तलाठी कल्लाप्पा देवाप्पा शेरखाने (वय 54,रा प्लॉट नं. 54 संभाजीपूर आण्णासाहेब चकोते शाळेसमोर जयसिंगपूर ) लाच लुचपत प्रतिबंधक विभागाच्या जाळ्यात रंगेहाथ सापडला. आज दुपारी दोन च्या सुमारास येथील मंडल व तलाठी कार्यालयात हा प्रकार घडला.

हुपरी येथील एका शेतकऱ्यांने आपल्या मालकीच्या शेतात काही दिवसांपूर्वी बोअर मारला आहे. या बोअरची सात बारा पत्रकी नोंद घालण्यासाठी त्यांनी अनेकदा तलाठी कार्यालयाचे उंबरठे झिजवले. पण तलाठी कल्लाप्पा शेरखाने यांच्या कडून दाद दिली जात नव्हती.तक्रारदाराने वारंवार विचारणा केली असता तीन हजार रूपये दिल्यास सात बारा पत्रकी नोंद घालू असे म्हणत लाचेची मागणी केली.

वाचा - कायमस्वरूपी नोकरी लावतो म्हणत सीपीआरच्या कर्मचाऱ्याने घेतली 25 हजाराची लाच अन्...

त्याबाबत लाच लुचपत प्रतिबंधक विभागाने पडताळणी करून आज सापळा रचला असता कल्लाप्पा शेरखाने हा लाचेच्या तीन हजार रकमे पैकी दोन हजार रुपये स्विकारताना रंगेहाथ सापडला.

लाप्रवि पुणेचे पोलीस अधीक्षक राजेश बनसोडे, पोलीस अधीक्षक, श्रीमती सुषमा चव्हाण, कोल्हापूर विभागाचे उपअधीक्षक आदिनाथ बुधवंत यांच्या मार्गदर्शनाखाली पोलीस निरीक्षक युवराज सरनोबत, पोलीस हवालदार श्री. खोत, पोलीस नाईक श्री. पोरे,श्री. कदम, श्री. घोसाळकर आदींच्या पथकाने ही कारवाई केली.