कागल : ‘शाहू साखर कारखान्यात कारखान्याचे संस्थापक स्व. राजे विक्रमसिंहजी घाटगे यांनी लोकहिताच्या निर्णयांना नेहमीच प्राधान्य दिले. त्यासाठी व्यक्तिगत नुकसान सोसले, पण कारखाना व शेतकरी हितासाठी तडजोड केली नाही. त्यांचे हे धोरण राज्यभर "शाहू पॅटर्न" म्हणून नावाजले गेले. यावर्षी शेतकरी अडचणीत असताना एकरकमी एफआरपी देण्याचा निर्णय हा याच पॅटर्नचा एक भाग आहे,’ असे प्रतिपादन शाहू कारखान्याचे अध्यक्ष राजे समरजितसिंह घाटगे यांनी केले.शाहू साखर कारखान्याच्या ४२ व्या गळीत हंगामाच्या प्रारंभप्रसंगी ते बोलत होते.

श्री. घाटगे म्हणाले, ‘आज सर्वत्र शाहू पॅटर्न यशस्वी म्हणून नावाजला जातो, मात्र त्यासाठी स्व. राजे विक्रमसिंहजी घाटगे यांनी कष्ट घेतले आहेत. प्रसंगी कटू निर्णय घेतले त्यांना सर्व सभासद शेतकरी बांधवांनी साथ दिली. त्यामुळे हा पॅटर्न नावारूपास आला आहे. शाहू पॅटर्नमुळे अडचणीत असलेल्या शेतकऱ्यांना दिलासा देण्यासाठी आम्ही एकरकमी एफआरपी देण्याचा निर्णय घेऊ शकलो. हा निर्णय कुणाला त्रास देण्यासाठी किंवा अडचणीत आणण्यासाठी नाही तर अडचणीतीत शेतकऱ्यांसाठी घेतला आहे.’

यावेळी संचालक व कर्नाटकचे माजी ऊर्जा राज्यमंत्री वीरकुमार पाटील, संचालक, कार्यकारी संचालक जितेंद्र चव्हाण आदी उपस्थित होते. यावेळी गव्हाण पूजा वीरकुमार पाटील व त्यांच्या पत्नी आशाराणी, केनयार्ड विभागात मारुती निगवे व त्यांच्या पत्नी भारती व काटापूजन पी. डी. चौगुले व त्यांच्या पत्नी हौसाबाई यांनी केले. उपाध्यक्ष अमरसिंह घोरपडे यांनी स्वागत केले. सचिन मगदूम यांनी आभार मानले.