गडहिंग्लज : राज्यातील पॉलिटेक्‍निक तृतीय वर्षाचा निकाल जाहीर झाला आहे. महाराष्ट्र राज्य तंत्रशिक्षण मंडळातर्फे गेल्या महिन्यात ऑनलाईन परिक्षा झाल्या होत्या. कोरोनामुळे तब्बल सात महिने उशिरा झालेल्या परिक्षेत विद्यार्थ्यांनी अधिक गुणांचा पाऊस पाडला आहे. परिक्षा होणार की नाही या चिंतेत असणारे पालक या यशाने सुखावले आहेत. 

दरवर्षी एप्रिल हिन्यात पॉलिटेक्‍निकच्या परिक्षा होतात. यंदा कोरोनाचा संर्सग वाढू नये यासाठी मार्च महिन्यापासून सर्वच शैक्षणिक संस्थाचे कामकाज थांबविण्यात आले. त्यानंतर लॉंकडाउन सुरू झाला. त्यातच महाराष्ट्रात कोरोनाची परिस्थिती अधिक चिंताजनक असल्याने राज्याच्या उच्च शिक्षण विभागाने परिक्षा रद्द करण्याचा निर्णय घेतला. त्याप्रमाणे पहिल्या व दुसऱ्या वर्षाच्या परिक्षा रद्द करुन त्यांचा वर्षभरातील आढावा आणि गतपरिक्षेतील कामगिरी यांच्या सरासरीवर निकाल लावण्यात आला. 

पंरतु, तृतीय वर्षाचा परिक्षा घेण्याची सुचना सर्वोच्च न्यायालयाने केली. त्यामुळे राज्य तंत्रशिक्षण मंडळाने फिजिकल डिस्टन्स राखण्यासाठी विद्यार्थ्यांना घरुन ऑनलाईन परिक्षा देण्याचा पर्याय दिला. पॉलिटेक्‍निकच्या इतिहासात प्रथमच ऑनलाईन परिक्षा झाल्या. चाळीस मार्काची ही परिक्षा विकल्प पध्दतीने झाली. परिक्षा चुकलेल्या विद्यार्थ्यांना पुन्हा एक संधी देण्यात आली होती. ऑनलाईनचा पुरेपुर फायदा उठवत विद्यार्थ्यांनी टक्‍केवारीची शिखरे रचली. विद्यार्थ्यांसाठी काल (ता.3 ) पासुन संकेतस्थळावर हा निकाल जाहीर झाला. निकाल लागल्याने पालकांनीही सुटकेचा निश्‍वास टाकला. पंधरवड्यानंतर विद्यार्थ्यांना आपापल्या संस्थेत मुळ गुणपत्रके मिळतील. 

संपादन - सचिन चराटी