कोल्हापूर : शिवाजी विद्यापीठांतर्गत तीन नव्या महाविद्यालयांना आज परवानगी देण्यात आली. बी.ए., बी.कॉम., बी.एस्सी., हॉस्पिटॅलिटी मॅनेजमेंट या अभ्यासक्रमांची ही महाविद्यालये असून या वर्षीपासून तेथे अध्यापन सुरू होईल. विद्यापीठाच्या अधिकार मंडळाच्या बैठकीत ही मान्यता दिली.

हेही वाचा - दिव्यांग सुप्रियाची जिद्द ; मटेरिअलच्या ऑनलाईन विक्रीतून झाली आत्मनिर्भर -

विद्यापीठाने बृहत आराखड्याअंतर्गत काही वर्षांत नवीन महाविद्यालये सुरू करण्याबाबतचे प्रस्ताव मागविले होते. आवश्‍यक कागदपत्रे प्राप्त झाल्यानंतर विद्यापीठाने हे प्रस्ताव शासनास सादर केले. त्यानंतर या वर्षी तीन नवीन महाविद्यालये सुरू करण्यास शासनाने मंजुरी दिली आहे. यात ज्ञानसागर बहुद्देशीय संस्थेचे कला, वाणिज्य व विज्ञान महाविद्यालय, कोनोली तर्फ असंडोली (पो. गारिवडे ता.राधानगरी), डॉ. तानाजीराव चोरगे कला, वाणिज्य व विज्ञान वरिष्ठ महाविद्यालय, नंदवाळ (ता. करवीर), जेनेसिस कॉलेज हॉटेल मॅनेजमेंट, मौजे सोन्याची शिरोली (ता. राधानगरी) यांचा समावेश आहे. 

विद्यापीठसंलग्न महाविद्यालयांना पाठविण्यात येणारी परिपत्रके व इतर शैक्षणिक माहिती या महाविद्यालयांना पाठविण्यात यावी, असे पत्रक संलग्नता विभागाचे उपकुलसचिव विलास सोयम यांनी काढले आहे.

हेही वाचा -  कोल्हापुरात उद्याची त्र्यंबोली यात्रा रद्द

संपादन - स्नेहल कदम