कोल्हापूर - कोरोना व्हायरसचा संसर्ग जगभरासह भारतात ही वाढत असल्याने भारतातील विविध राज्यात कोरोनाग्रस्त रुग्ण आढळून येत आहेत. खबरदारी म्हणुन देशातील विविध मंदिरे तसेच इतर प्रार्थना स्थळे बंद करण्यात येत आहेत.आंध्रप्रदेश मधील तिरुपती बालाजीचे मंदिर बंद ठेवण्याचा निर्णय देवस्थान समितीने घेतला आहे.

काल वाराणसी वरुन सुमारे शंभर भाविकांचा समुह तिरुपती बालाजीच्या दर्शनासाठी आला होता परंतु या भक्तांतील एकास तिव्र ताप,सर्दी,खोकला अशी कोरोनाची लक्षणे आढळून आल्याने खळबळ उडाली.या संशयित रूग्णास उपचारासाठी तातडीने रूईया येथील आयसोलेशन वार्ड मध्ये ठेवण्यात आले आहे.याच पार्श्वभूमीवर मंदिर प्रशासनाने तातडीने मंदिर भाविकांच्या दर्शनासाठी बंद ठेवण्याचा निर्णय घेतला आहे. मंदिरातील पूजा,विधी या सुरु राहतील परंतु दर्शन मात्र येत्या काही काळासाठी बंद राहिल असं मंदिर प्रशासनाकडून सांगण्यात आले आहे.या मंदिराकडे देशभरातील भक्तांचा ओढा सतत असतो.परंतु या निर्णयामुळे भक्त दर्शना पासून लांब राहणार आहेत.