कोलीक हद्दीतील खिंड बंद करा
आमदार पाटील; हत्तींच्या कर्नाटकातून येणाऱ्या मार्गाबाबत मुख्यमंत्र्यांना निवेदन
सकाळ वृत्तसेवा
चंदगड, ता. ७ ः चंदगड, आजरा, गडहिंग्लज विभागात वन्य प्राण्यांच्या त्रासाने शेतकरी हैराण झाले आहेत. यासंदर्भात कायमस्वरुपी उपाययोजना करावी, अशी मागणी आमदार राजेश पाटील यांनी निवेदनाद्वारे मुख्यमंत्री उध्दव ठाकरे यांच्याकडे केली आहे. दरम्यान, कर्नाटकातील हत्ती कोलीक (ता. चंदगड) येथील खिंडीतून महाराष्ट्रात प्रवेश करतात. ही खिंड बंद केल्यास त्यांचा प्रवेश रोखला जाईल. गवे व इतर प्राण्यांकडून होणारे नुकसान आणि भरपाई वाढवून मिळणे यासह विविध मुद्यांकडे या निवेदनातून लक्ष वेधण्यात आले.
हत्तींना रोखण्यासाठी वन विभागाने जागोजागी चर खोदाई केली आहे. परंतु हत्ती हा हुशार प्राणी असल्याने त्याने ते बुजवून किंवा अन्य पर्यायी मार्गाने महाराष्ट्रात प्रवेश करीत आहेत. मनुष्यवस्ती तसेच पिकांची नासधूस करीत आहेत. यासंदर्भात खासदार संजय मंडलिक व आमदार प्रकाश आबिटकर यांनी वन अधिकाऱ्यांची बैठक घेतली होती. बैठकीत दक्षिणेकडील राज्यामध्ये हत्तींना कशा प्रकारे अटकाव केला जातो याची चित्रफीत दाखवण्यात आली होती. या पध्दतीचा अवलंब करुन कोलीक (ता. चंदगड) येथे जंगलातील खिंडीवर प्रतिबंध करून कर्नाटकातून येणाऱ्या हत्तींना अटकाव करावा, अशी मागणी करण्यात आली आहे. वन्य प्राण्यांकडून केल्या जाणाऱ्या नुकसानीबाबतसुध्दा आमदार प्रकाश आबिटकर यांच्या अध्यक्षतेखाली समिती गठीत केली होती. या समितीने भरपाई वाढवून मिळावी यासाठी शासनाला अहवाल सादर केला आहे. परंतु त्याची अंमलबजावणी झालेली नाही. त्यामुळे शेतकऱ्यांचे अतोनात नुकसान होत आहे. शेतकरी कर्जबाजारी होत आहेत. ज्या पिकासाठी कर्ज घेतले जाते ते पिकच उद्‍ध्वस्त होत असल्याने कर्ज परतफेड करायची कशी, असा त्यांच्यापुढे प्रश्‍न आहे. त्यामुळे या सर्वच बाबींकडे गांभीर्याने पाहून शासन स्तरावर निर्णय घेतले जावेत, अशी मागणी करण्यात आली आहे.