14427
अडकूर ः सरपंच यशोदा कांबळे व उपसरपंच अनिल कांबळे यांच्याकडे मागणीचे निवेदन देताना ग्रामस्थ.

अडकूर ग्रामपंचायतीवर मोर्चा
रस्त्याकडे दुर्लक्ष केल्याच्या मुद्यावर ग्रामस्थ आक्रमक
सकाळ वृत्तसेवा
चंदगड, ता. १२ ः अडकूर (ता. चंदगड) येथील पाटील गल्लीतील रस्त्याच्या दुरुस्तीकडे ग्रामपंचायतीने दुर्लक्ष केल्याच्या मुद्यावरून आक्रमक ग्रामस्थांनी ग्रामपंचायत कार्यालयावर मोर्चा काढला. सरपंच यशोदा कांबळे, उपसरपंच अनिल कांबळे यांच्यासमोर त्यांनी प्रश्‍नांची सरबत्ती केली. वित्त आयोगाच्या निधीतून या रस्त्याचे काम करून घेतले जाईल, असे आश्‍वासन सरपंच व उपसरपंचांनी दिले.
गावच्या नळपाणी योजनेसाठी पाटील गल्लीतील रस्ता दोन वर्षांपूर्वी खोदण्यात आला. पाईप लाईन टाकल्यावर पुन्हा रस्ता केला जाईल, असे त्यावेळी सांगण्यात आले होते; परंतु त्याकडे दुर्लक्ष करण्यात आले. मधोमध रस्त्याची खोदाई केल्यामुळे ग्रामस्थांना रहदारीला त्रास होत होता. दिव्यांग बांधवांना चालताना तर खूपच कसरत करावी लागत होती. या प्रश्‍नावर आक्रमक झालेल्या नागरिकांनी आज तडक ग्रामपंचायत कार्यालय गाठले. त्यावेळी सरपंच, उपसरपंच, ग्रामसेवक यांपैकी कोणीही हजर नव्हते. काही वेळाने सरपंच व उपसरपंच उपस्थित झाले. यावेळी नागरिकांनी त्यांना रस्त्याच्या दुरवस्थेबद्दल प्रश्न केले. पंधरा दिवसांच्या आत हा रस्ता पूर्ण करावा, अशी मागणी केली. त्यावर सरपंच यशोदा कांबळे, उपसरपंच अनिल कांबळे यांनी वित्त आयोगाच्या निधीतून खर्चाची तजवीज करून हा रस्ता पूर्ण करण्याचे आश्वासन दिले. यावेळी महेश देसाई, नंदकुमार गार्डेकर, संजय देसाई, संदीप देसाई, बशीर जमादार, संजीवनी देसाई, सुरेखा देसाई, वैशाली देसाई, अनिता देसाई, अनिता सावर्डेकर, सुमन देसाई, संयोगिता देसाई, शीतल देसाई, उज्वला देसाई, प्रियांका ऐतवडेकर, विमल डेगवेकर आदी उपस्थित होते.