येलूरला श्रमसंस्कार शिबिर
आंबा ः युवा पिढीच देशाचे खरे भांडवल आहे. राष्ट्राच्या प्रगतीचे सुकाणू युवकांच्या हाती असल्याचे प्रतिपादन प्रा. शिवाप्पा पाटील यांनी केले. शिवाजी विद्यापीठ, प्रा. डॉ. एन. डी. पाटील महाविद्यालय मलकापूर - पेरीड व यशवंतराव चव्हाण महाराष्ट्र मुक्त विद्यापीठ नाशिक संलग्नित अभ्यास केंद्र मलकापूर यांच्या संयुक्त विद्यमाने येलूरला राष्ट्रीय सेवा योजना विभागाच्या विशेष श्रमसंस्कार शिबिरात राष्ट्रनिर्मितीत युवकांचे योगदान’वर ते बोलत होते. अध्यक्षस्थानी प्रा. समाधान जाधव होते. प्रा. पाटील म्हणाले, ‘भारताची जगात मान उंचावण्याचे कार्य युवकच करू शकतात. युवकांची सकारात्मक ऊर्जा विधायक बदल घडवते.’ येलूरचे सरपंच संदीप पोवार, ग्रामसेवक रावसाहेब कोळी, प्रा. सुरेखा फडतरे, प्रा. लतिका जाधव, प्रा. प्रशांत भालसिंग, प्रा. भास्कर चिखलीकर उपस्थित होते. मानसी पाटील हिने पाहुण्यांचा परिचय करून दिला. प्रा. सचिन चव्हाण यांनी प्रास्ताविक, ऋतुजा पाटील सूत्रसंचालन व अभिषेक जोंधळे यांनी आभार मानले. याकामी ममता जाधव, संजीवनी लोखंडे आदींनी परिश्रम घेतले.