जुगाई मंदिराचा आज कलशारोहण सोहळा
आंबा : येळवण जुगाई येथील श्री जुगाईदेवी मंदिराचा वास्तुशांती व कलशारोहण सोहळा उद्या (ता. ३) आयोजित केल्याची माहिती देवस्थान उपसमितीचे अध्यक्ष शरद कांबळे व पुजारी बबन गुरव यांनी दिली. बुधवारी पहाटे श्री जुगाईदेवीस महाअभिषेक, पूजा, नवग्रह पूजन, वास्तू होम, कलश पूजन व कलशारोहणाचा सोहळा श्री रविशंकर महाराज - रायपाटण यांच्या हस्ते होणार आहे. सोहळ्यानिमित्त महाप्रसादाचे आयोजन केले आहे. संध्याकाळी प्रसाद महाराज बडवे, पंढरपूर यांचे किर्तन होणार आहे. सोहळ्यासाठी येणाऱ्या भक्तांना प्राथमिक सुविधा देण्यासाठी प्रशासकीय यंत्रणा कार्यरत असल्याची माहिती सरपंच सत्यवान खेतल व उपसरपंच इस्माईल महात यांनी दिली. दरम्यान, येळवण जुगाई पंचक्रोशीतील भाविक भक्तांनी ९ मेपर्यंत मांसाहार व मद्यपानासह देवीची कोंबडी, बकरीची जत्रा न करण्याचे आवाहन देवस्थान समिती, ग्रामस्थ व ग्रामपंचायतीने केले आहे.