02096
...
कासारी धरणाच्या पाण्यात
बुडून युवकाचा मृत्यू
आंबा, ता. १०ः गजापूर येथील कासारी धरणाच्या जलाशयात अंघोळीसाठी गेलेल्या युवकाचा पाण्यात बुडून मृत्यू झाला. महंमद रसूल शाडगुपी (वय १८, रा. बानसंद्रा, ता. सुर्वेकरी, जि. तुमकूर - कर्नाटक) असे त्याचे नाव आहे. ही घटना आज सकाळी आठ वाजण्याच्या सुमारास घडली. घटनेची नोंद शाहूवाडी पोलिसांत झाली आहे.
घटनास्थळ व पोलिसांनी दिलेल्या माहितीनुसार, महंमद शाडगुपी हा गुरुवारी रात्री कुटुंबासह खासगी गाडीने विशाळगड दर्शनासाठी आला होता. रात्रभर प्रवास केल्यानंतर हे कुटुंबीय धरणाच्या पाण्यात अंघोळीसाठी थांबले. दरम्यान, पाण्याचा अंदाज न आल्याने महमंद जलाशयात बुडाला. डोळ्यासमोर आपल्या मुलाचा झालेला मृत्यू पाहून आई व दोन बहिणींनी हंबरडा फोडला. दुपारी दोनच्या सुमारास कोल्हापूर येथील आपत्कालीन यंत्रणा दाखल झाली. दीड तासांच्या शोधमोहिमेनंतर मृतदेह पाण्याबाहेर काढला. मलकापूर येथील ग्रामीण रुग्णालयात मृतदेहाचे शवविच्छेदन करण्यात आले.