कोदे येथे गवा रेड्याचा मृत्यू

असळज, ता.२९ : कोदे (ता.गगनबावडा) येथील जंगल हद्दीनजीक विहीरीत पडलेल्या गवा रेड्याचा अखेर मृत्यू झाला. तहान भागविणाऱ्या पाण्यानेच गवा रेड्याचा जीव घेतला. गगनबावडा वनविभागाने केलेल्या प्रयत्नांना अपयश आले.
गेल्या काही दिवसांपासून कमालीचा उष्मा वाढला आहे. शनिवारी पहाटे पाण्याच्या शोधार्थ गवा येथील मानवी वस्तीकडे आला होता. गगनबावडा तालुक्यातील कोदे येथील युवराज शंकर कुंभार यांच्या मालकीच्या विहीरीत तो उतरला होता. त्या विहिरीतून त्याला पुन्हा बाहेर पडता आले नाही. सकाळी काही लोकांना या प्रकाराची माहिती मिळताच त्यांनी वनविभागास कळविले. जेसीबी मशीनच्या सहाय्याने गवा बाहेर येण्यासाठी मार्ग केला. गगनबावडा वनविभागाच्या वतीने वनपाल आर. ए. ऊलपे, प्रकाश खाडे, मारुती व्होवळे यांनी यासाठी प्रयत्न केले.
पण तोपर्यंत खूप उशिरा झाला होता. पाण्यातच त्याचा जीव गेला होता. तहान भागविणाऱ्या पाण्यानेच त्याचा जीव घेतला.