अनेक उलथापालथींची शक्यता!
सकाळ वृतसेवा
बिद्री ता. १६ : कागल, राधानगरी, भुदरगड आणि करवीर तालुक्यातील २१८ गावांचे कार्यक्षेत्र असलेल्या आणि सुमारे ६३ हजार सभासद संख्या असलेल्या बिद्री (ता. कागल ) येथील श्री दूधगंगा वेदगंगा सहकारी साखर कारखान्याची निवडणूक वेगळ्या टप्प्यावर पोहचली आहे. राष्ट्रवादी (अजित पवार गट) जिल्हाध्यक्ष आणि कारखान्याचे संचालक ए. वाय. पाटील यांच्यापाठोपाठ विद्यमान उपाध्यक्ष विठ्ठलराव खोराटे हे विरोधी खासदार संजय मंडलिक व आमदाक प्रकाश आबिटकर यांच्या गोटात दाखल झाले आहेत. त्यामुळे या निवडणूकीत रंगत निर्माण झाली असून दोन्ही पॅनेलची अधिकृत घोषणा झाल्यानंतर अनेक उलथापालथींची शक्यता वर्तवली जात आहे.
बिद्री साखर कारखान्याच्या संचालक मंडळाची मुदत वर्षभरापूर्वी संपली आहे. त्यानंतर विविध कारणांनी ही निवडणूक पुढे ढकलण्यात आली. आता ३ डिसेंबर रोजी या कारखान्यासाठी मतदान होणार असून निवडणूकीसाठी विक्रमी अर्ज दाखल झाल्याने ही निवडणूक चुरशीने होणार याचा अंदाज आधीच वर्तवला जात होता. अर्ज माघार घेण्याच्या शेवटच्या टप्प्यात केवळ २८ उमेदवारांनी अर्ज माघार घेतले असून अजूनही मोठ्या संख्येने उमेदवारी अर्ज शिल्लक राहिले आहेत.
ही निवडणूक दुरंगी होणार असल्याचे जवळपास निश्चित झाले असून मागील दोन दिवसांत राजकीय घडामोडींनी वेग घेतला आहे. यातूनच स्वतःच्याच पक्षाच्या नेत्यांवर नाराज असलेले राष्ट्रवादीचे जिल्हाध्यक्ष ए. वाय. पाटील यांनी सत्ताधारी आघाडीला रामराम करत विरोधी आमदार आबिटकर यांच्या पॅनेलला पाठींबा देण्याचा निर्णय घेतला आहे. त्यामुळे सत्तारुढ गटाला हा मोठा धक्का मानला जात आहे.
गेल्या निवडणूकीत भाजपच्या कोट्यातून निवडून आलेले व सहा वर्षे उपाध्यक्ष राहिलेले जनता दलाचे नेते विठ्ठलराव खोराटे हे ही विरोधी आघाडीसोबत जाण्याचा निर्णय घेणार असल्याचे बोलले जात आहे. यांमुळे विरोधी आघाडीचे बळ वाढणार असून ही निवडणूक चुरशीने होणार आहे. आज होणाऱ्या पॅनेल निश्चितीनंतर अजुनही बऱ्याच घडामोडी घडण्याची शक्यता असून त्यानंतरच लढतीचे चित्र स्पष्ट होणार आहे.