02378
मुदाळतिट्टा : येथील अर्धवट स्थितीतील कामांमुळे वारंवार वाहतूक कोंडी होते.

मुदाळतिट्टा येथे
सातत्याने कोंडी
रस्त्यावरील उंचवटे ठरताहेत घातक
दत्तात्रय वारके : सकाळ वृत्तसेवा
बिद्री, ता. १२ : कागल, राधानगरी व भुदरगड तालुक्यांना जोडणाऱ्या मुधाळतिट्टा येथील रस्त्याची अपुरी कामे अपघाताला निमंत्रण देत आहेत. या अपुऱ्या कामांमुळे सातत्याने वाहतूक कोंडी होत असून, याचा प्रवाशांना मनस्ताप सहन करावा लागत आहे. येथील काँक्रिटच्या रस्त्याला बाजूपट्ट्याच नसल्याने रस्त्याला निर्माण झालेला उंचवटा धोकादायक ठरत आहे. यामुळे येथे वारंवार अपघात होत आहेत.
कोल्हापूर-गारगोटी व निपाणी-राधानगरी हे दोन महत्त्वाचे राज्यमार्ग मुदाळतिट्टा येथे जोडले गेले आहेत. याठिकाणी नवीन रस्त्याचे काम सुरू असून ते अर्धवटच राहिले आहे. सिमेंट कॉक्रिटीकरण केलेल्या रस्त्याला बाजूपट्टया न केल्याने रस्ता खचला आहे. त्यामुळे दोन्ही बाजूला उंचवटे निर्माण झाले आहेत. हे उंचवटे चालकांना दिसत नसल्यामुळे येथून वाहतूक करणे कसरतीचे झाले आहे.
रस्त्याच्या बाजूच्या गटाराशेजारील कामे पूर्ण झाली नसल्यामुळे येथे वाहन पार्किंगसुद्धा करता येत नाही. काँक्रिटच्या अपुऱ्या रस्त्यावरून चारही मार्गावरून वाहतूक सुरू आहे. त्यामुळे या उंचवट्यावर एखादे वाहन अडकले तर ते रस्ता पास करेपर्यंत येथे वाहतुकीची कोंडी होते. त्यामुळे प्रवासी वर्गाला वाहतुकीच्या कोंडीचा सामना करावा लागतो. येथे राहिलेल्या रस्त्याचा अपुरा भाग पूर्ण करून घ्यावा, अशी मागणी वाहनधारकांतून जोर धरू लागली आहे.
------------
कोट
अनेकवेळा वाहतुकीची कोंडी होताना दिसत आहे. रविवार व आमावास्याच्या दिवशी वाहतूक कोंडी नित्याचीच बाब झाली आहे. या कोंडीमुळे वाहनांच्या लांबच लांब रांगा लागतात. याचा वाहनधारक व प्रवाशांना नाहक मनस्ताप सहन करावा लागतो.
- अक्षय घोडके प्रवासी