02381
सोनाळी : येथील सेवानिवृत्त मुख्याध्यापक पी. व्ही. पाटील यांनी घराची वास्तुशांती व गृहप्रवेश विधवा महिला व विधुरांच्या उपस्थितीत केला. यावेळी पाटील कुटुंबीयांनी त्यांचे पाद्यपूजन केले.
...............
विधवा-विधुरांच्या पाद्यपूजनाने गृहप्रवेश

सोनाळीतील सेवानिवृत्त मुख्याध्यापकांचा आदर्शवत उपक्रम

दत्तात्रय वारके ः सकाळ वृत्तसेवा
बिद्री, ता. १४ : जिल्ह्यातील हेरवाड ग्रामपंचायतीने पतीच्या निधनानंतर त्याच्या पत्नीला पार पाडाव्या लागणाऱ्या अनिष्ठ प्रथा बंद करण्याचा निर्णय काही दिवसांपूर्वी घेतला होता. आता याच्या पुढे एक पाऊल टाकत सोनाळी (ता. कागल) येथील सेवानिवृत्त मुख्याध्यापक पी. व्ही. पाटील व त्यांच्या कुटुंबाने आपल्या नवीन वास्तूचा गृहप्रवेश विधवा महिला आणि विधुरांचे पाद्यपूजन करून साजरा करत समाजासमोर नवा आदर्श निर्माण केला आहे.
पी. व्ही. पाटील यांनी मुख्याध्यापक म्हणून २८ वर्षे सेवा बजावली आहे. बिद्री (ता. कागल) येथील भारतमाता हायस्कूलमधून ते ३१ मे २०२३ रोजी सेवानिवृत्त झाले. त्यांनी सोनाळी येथे बांधलेल्या नवीन वास्तूच्या गृह प्रवेशावेळी पारंपरिक रुढी परंपरांना फाटा देत कुठल्याही मंगल कार्यापासून वंचित ठेवल्या जाणाऱ्या विधवा तसेच विधुरांना सामावून घेण्याचे ठरवले.
त्यांच्या या निर्णयाला त्यांच्या आई, पत्नी, मुले आणि सुना या सर्वांनीच पाठिंबा दिला. पतीचे अकाली निधन झालेल्या गावातील विधवा महिला आणि संसाराच्या अर्ध्या वाटेवर पत्नीची साथ सुटलेल्या विधुरांना पाटील कुटुंबीयांनी वास्तुशांतीसाठी आग्रहाचे निमंत्रण दिले. नव्या घरात त्यांचे पाद्यपूजन करून या सर्वांच्या उपस्थितीत पाटील कुटुंबाने गृहप्रवेश केला. त्यांच्या या उपक्रमाचे गावासह परिसरातूनही कौतुक होत आहे.
......
कोट...
मी गर्भात असतानाच आईला वैधव्य आले. त्यामुळे माझ्यासह भावंडांचा सांभाळ करताना तिला सहन कराव्या लागलेल्या हालअपेष्टा मी स्वतः अनुभवल्या आहेत. तिच्यासारख्याच अन्य महिलांचाही सन्मान व्हावा, या उद्देशाने त्यांचे पाद्यपूजन करून गृहप्रवेश केला. अशा मंगल समयी अनेक वर्षांनंतर अग्रस्थान मिळाल्याने त्यांच्या चेहऱ्यावरील आनंद मला अन्य गोष्टींपेक्षा मौल्यवान होता.
- पी. व्ही. पाटील, सेवानिवृत्त मुख्याध्यापक.
....