गारगोटी-कोल्हापूर मार्गावर
होर्डिंगचा प्रश्न ऐरणीवर

स्ट्रक्चरल ऑडिट करण्याची जनतेतून मागणी

सकाळ वृत्तसेवा
बिद्री, ता. २१ : मुंबईतील घाटकोपर येथील महाकाय होर्डिंग कोसळल्याच्या पार्श्वभूमीवर गारगोटी-कोल्हापूर राज्यमार्गावरील रस्त्याकडेला व अनेक ठिकाणी नागरी वस्तीत इमारतींवरील शेकडो होर्डिंगचा प्रश्न ऐरणीवर आला आहे. अशा होर्डिंगचे स्ट्रक्चरल ऑडिट होण्याची मागणी जनतेतून होत आहे.
गारगोटी-कोल्हापूर या ६० किलोमीटर अंतराच्या मार्गावर दोन्ही बाजूला असणाऱ्या शेतवडीत, तर काही ठिकाणी नागरी वस्तीत इमारतींवर जाहिरात एजन्सींनी संबंधित शेतकऱ्यांना व घरमालकांना ठराविक मोबदला देऊन शेकडो भलीमोठी होर्डिंग उभारली आहेत. ही होर्डिंग रस्त्याच्या बाजूला असून, बऱ्याचदा अपघाताला निमंत्रण देत आहेत. अशा प्रकारची होर्डिंग कोसळून विजेचे शॉर्ट सर्किट होण्याच्या घटना घडल्या आहेत. होर्डिंग लावताना ग्रामपंचायतीची परवानगी घेतली आहे की नाही, हा प्रश्न अनुत्तरित आहे. मात्र, याला कोणाकडून परवाना घेतला आहे का, याबाबत कोणतीही खबरबात नाही. होर्डिंग कित्येक वर्षांपूर्वी उभाल्याने त्यांचे स्ट्रक्चरल ऑडिट होणे गरजेचे आहे. वळवाच्या मुसळधार पावसामध्ये अनेक वेळा अशी होर्डिंग उखडून पडली आहेत. सुदैवाने या होर्डिंगच्या परिसरात शेतकरी न थांबल्याने दुर्घटना घडलेली नाही. मात्र घाटकोपर येथे घडलेल्या घटनेनंतर या होर्डिंगचा प्रश्न ऐरणीवर आला आहे. त्यामुळे अशा होर्डिंगची माहिती घेऊन याबाबत योग्य ती कार्यवाही होणे गरजेचे आहे, अशी मागणी जनतेतून होत आहे.