02704

शालेय साहित्य खरेदीसाठी
बांबवडे बाजारपेठेत गर्दी

बांबवडे, ता. १० ः येथील बाजारपेठ पालकांसह शालेय मुलांनी फुलली आहे. प्राथमिक माध्यमिक शाळा १६ जूनपासून सुरू होत आहेत. सीबीएसईच्या शाळा ९ तारखेला सुरू झाल्या आहेत. पाल्याला नवीन दप्तर, चप्पल, बूट, वह्या-पुस्तके व साहित्य खरेदीसाठी बाजारपेठेत झुंबड उडाली आहे.
तालुक्यात काही ठिकाणी ५ वी, काही ठिकाणी ८ वी पर्यंत प्राथमिक शाळा आहेत. नंतर मुलांच्या शाळा बदलतात. त्यांना पुढील शिक्षणासाठी दुसऱ्या शाळेत जावे लागत आहे. त्यामुळे नवीन शाळेचे मुलांना वेध लागले आहेत. यासाठी पालक नियोजन करत असून नवीन येणाऱ्या मुलांना प्रवेश देण्यासाठी शाळा सज्ज झाल्या आहेत. तर बाजारपेठतील दुकाने शालोपयोगी साहित्याचे स्टॉल उभारून तयार आहेत.
चालू शैक्षणिक वर्षात नवीन शैक्षणिक धोरण लागू होत आहेत. इयत्ता पहिली साठीचा अभ्यासक्रम बदलला असून कृतीयुक्त शिक्षणावर ती अधिक भर आहे. त्यामुळे विद्यार्थ्यांच्या बरोबर पालकांच्या मध्ये देखील उत्सुकता आहे. इयत्ता आठवीसाठी एन एम एम एस व स्कॉलरशिप सारख्या परीक्षांना सामोरे जाण्यासाठी देखील विद्यार्थ्यांच्या मध्ये नवीन उत्साह दिसून येत आहेत. एकंदरीत नवीन शैक्षणिक धोरणाच्या पार्श्वभूमीवर विद्यार्थी शिक्षक पालक नव्या आव्हानांना सामोरे जाण्यासाठी उत्सुक आहेत, अशी प्रतिक्रिया न्यू इंग्लिश स्कूल, सावेचे शिक्षक बाबासाहेब कदम यांनी दिली.