03467

रानोमाळात रंगले शाळांचे वनभोजन
पावटयाच्या भाजीचा आस्वाद; पर्यावरणाची ओळखच उद्देश

सकाळ वृत्तसेवा

बोरपाडळे, ता. ६ : प्राथमिकसह अंगणवाड्या आणि माध्यमिक शाळांमध्ये सध्या वनभोजनाचा उपक्रम जोमात सुरू आहे. विशेषतः अनेक प्राथमिक शाळांचा सहभाग मोठ्या उत्साहाने यामध्ये दिसत आहेत. यामध्ये बोरपाडळेसह परिसरातील शहापूर, मिठारवाडी, माले, पोखले, आंबवडे, काखे, मोहरे, आवळी, पैजारवाडी, नावली, शिंदेवाडी, आमतेवाडी आदी शाळांमध्ये वनभोजनाचा उपक्रम राबविला आहे. डोंगराळ किंवा गावापासून दूर भागातील झाडीत, एखाद्या पाणवठ्याजवळच्या ठिकाणाजवळ बेत आयोजित केला आहे. यासाठी आवळीसह मिठारवाडी, आपटी, नावली व आंबवडेतील पावट्याला अधिक पसंदी असून खरेदीसाठी शिक्षक खरेदीसाठी जात आहेत. तब्बल दोनशे रुपये दर असतानाही खरेदी होत आहे. पावटयाच्या आमटी-भाजीचा दरवळ रानावनात घुमत असून विद्यार्थ्यांच्या गाण्यांची-भेंड्यांची याला साथ मिळत आहे. सहभोजनाबरोबरच परिसरातील गोष्टींशी मिळतेजुळते घेणे, निसर्गाशी समरूप होणे, सहभोजनाचा आस्वाद घेणे तसेच माती, झाडे, पक्षी फुले, फळे आदींचे निरीक्षण करण्याचा हाच उद्देश असल्याचे काखेच्या शिक्षिका विजयमाला यादव यांनी सांगितले. या उपक्रमासाठी सरपंच, शाळा व्यवस्थापन अध्यक्ष आणि सदस्यांचे सहकार्य लाभत आहे.
----------------------------------
चौकट
मुलांना पर्यावरणात सहभोजनाबरोबर परिसराचे अनुभवातून शिक्षण मिळते. चार भिंतीबाहेर पडल्याने निरिक्षण, सहशिक्षण, निसर्गात स्नेहभोजन आस्वाद आणि प्रत्यक्ष अनुभव मिळतो. यातून मुलांना अध्ययनासाठी प्रोत्साहन मिळेल.
- शरद जाधव, माजी सरपंच बोरपाडळे.