05820
कोनवडे ः भुदरगड तालुक्याच्या पश्चिम भागात भात रोप लावणीची सुरू असलेली लगबग.
.......
शिवारात पांढर फुलली

राधानगरी, भुदरगड तालुक्यांत भात रोप लावणीची धांदल

सकाळ वृत्तसेवा
शिरगाव/कोनवडे/धामोड, ता. ४ ः राधानगरी, भुदरगड तालुक्यातील भात रोप लावणीची कामे खोळंबली होती. मात्र, गेले चार दिवस तालुक्यात संततधार पावसाला सुरुवात असल्याने खोळंबलेल्या रोपलावणीला वेग आला आहे. बैलांच्या व रोटावेटर यंत्राच्या सहाय्याने चिखल करून भात रोप लावण्यात शेतकरी गुंतला असून, शिवारात पांढर फुलली आहे.
राधानगरी तालुक्याच्या पश्चिम भागात धामोडसह लाडवाडी, कोते, चांदे, केळोशी, खामकरवाडी, आपटाळ, म्हासुर्ली, कोनोली येथील परिसरासह भुदरगड तालुक्यातील फये, मिणचे, शेणगाव, हेदवडे, देवकेवाडी, पंडिवरे, टिक्केवाडी या पश्चिम भागातील शेतकरी भात रोप लावणीच्या कामात गुंतला आहे. भात लावणीसाठी भाताचे रोप तयार करण्यासाठी अगोदर तरवा टाकला जातो आणि पावसाचा जोर वाढला की, रोप लावणीच्या कामाला सुरुवात होते. मात्र, यंदा हे काम पावसाअभावी खोळंबले होते. रोहिणी नक्षत्रातील पेरण्या साधल्या. मृग नक्षत्राच्या पावसाने त्या तरारूनही आल्या. मात्र, काहीकाळ मृग नक्षत्राने विश्रांती घेतली आणि मृग संपून आर्द्रा नक्षत्र सुरू झाले. सुरुवातीला याही नक्षत्राने शेतकऱ्यांना प्रतीक्षा करायला लावली. त्यामुळे भात रोप लावणीची कामे खोळंबली.
परिणामी काही ठिकाणी नदी, विहिरीच्या पाण्यावर रोप लावणीच्या कामाला सुरुवात झाली. मात्र, डोंगर माथ्यावर आणि ज्या ठिकाणी पाण्याची सोय नाही, अशा ठिकाणची रोपलावणीची कामे खोळंबून राहिली. मात्र, शेतकऱ्यांचे डोळे आभाळाकडे लागले असतानाच गेले आठवडाभव पावसाने कृपा केली आणि संततधार सुरू केली. पाऊस सुरू झाल्याने शिवारात रोपलावणीसाठी एकच धांदल उडाली. तरवा काढणे, चिखल करणे, रोप लावणे आदी कामांसाठी शिवार पुलून गेल्याचे चित्र पाहावयास मिळत आहे.
....
चौकट...
मजूर टंचाईवर फुट्टा पद्धत
ग्रामीण भागात सध्या शेतमजुरांची कमतरता जाणवत आहे. त्यामुळे शेतकरी गट शेती अथवा फुट्टा पद्धतीने एकमेकांना भात लावणीसाठी मदत करतात. ग्रामीण भागात आजही फुट्टा पद्धतीचा वापर केला जातो.