‘लोंढा नाला’च्या गेटेड बंधाऱ्यांबाबत
दिरंगाई खपवून घेणार नाही ः आबीटकर

धामोड,ता .२४ :केळोशी बुद्रुक (ता. राधानगरी) येथील लोंढा नाला लघू पाटबंधारे प्रकल्पावरील गेटेड बंधारे शेतकऱ्यांना सिंचनाच्या दृष्टीने हितावह आहेत. कामाबाबत दिरंगाई झाल्यास लोकप्रतिनिधींना जनतेच्या रोषाना सामोरे जावे लागते. त्यामुळे या कामाबाबत कोणत्याही पद्धतीची दिरंगाई खपवून घेणार नाही असे आमदार प्रकाश आबीटकर यांनी सांगितले.
केळोशी बुद्रुक येथील गेटेड बंधाऱ्याच्या कामाबाबत आमदार व शासकीय अधिकारी यांच्यामध्ये कोल्हापूर शासकीय विश्रामगृह येथे बैठक झाली त्यावेळी ते बोलत होते. ''सकाळ''मध्ये लोंढा नाला लघु पाटबंधारे प्रकल्पावरील गेटेड बंधारे अडकले नात्यागोत्यात या मथळ्याखाली वृत्तमालिका प्रसिद्ध झाली होती. या पार्श्वभूमीवर ही बैठक झाली. उपविभागीय अभियंता उदय स्वामी, सहाय्यक अभियंता सोनाली दिघे, ठेकेदार संतोष पाटील, उद्धव वाळके, श्रीकांत पाटील, श्री सावंत, श्री. बिडीकर उपस्थित होते.
आमदार आबीटकर म्हणाले, ‘कामासाठी २९ जून २०२२रोजी ९ कोटी ७८लाख ४४ हजार ६२२ रुपये मंजूर होते. शासनाने ३१ मार्च २०२३ पूर्वी खर्च करण्यास सुधारित प्रशासकीय मान्यता दिली असताना एकूण १९ बंधाऱ्यापैकी दोन बंधाऱ्यांची कामे पूर्ण होऊनही बिले अदा का केली नाहीत? याबाबत शासकीय अधिकारी निरुत्तर झाले.

चौकट
आज पुन्हा बैठक
बैठकीला कार्यकारी अभियंता एस. आर. पाटील उपस्थित नसल्याने उद्या मंगळवार (ता. २५ ) रोजी चार वाजता पुन्हा बैठक बोलावली असल्याची माहिती आमदार प्रकाश आबीटकर यांनी दिली .